НАТО адмирали: «Путин Украинада стратегик мағлубиятга учради»

НАТО ҳарбий қўмитаси раиси адмирал Жузеппе Каво Драгоне BBCʼга берган интервюсида Россия президенти Владимир Путин Украинадаги урушда ўз мақсадларига ета олмаганини ва бу жараён унинг стратегик мағлубиятига айланганини таъкидлади.

Адмиралнинг сўзларига кўра, 2022 йилда Украинага босқин бошланиши НАТОнинг кенгайишига олиб келди — алянс таркибига Финландия ва Швеция қўшилди. Финландия Россия билан 1300 километрлик қуруқлик чегарасига эга, Швеция эса Балтика денгизига чиқиш имконияти билан муҳим стратегик аҳамият касб этади. Путин эса «махсус операция» бошланишида НАТОнинг Россия чегараларига яқинлашишига йўл қўймаслигини айтган эди.

Каво Драгоне Кремлнинг Украина президенти Володимир Зеленскийни ҳокимиятдан ағдариш режаси ҳам амалга ошмаганини қайд этди.

«Россия Беларусдаги каби дўстона ёки марионетка ҳукуматга эга бўла олмайди», — деди у.

Адмиралнинг таъкидлашича, Европа давлатлари ўз мудофаа сиёсатига жиддий ёндоша бошлади, ҳарбий харажатларни ялпи ички маҳсулотнинг 5 фоизигача ошириш ниятида ва Украинага қурол етказиб беришни давом эттирмоқда. Бунинг ўзиёқ Путиннинг «демилитаризация» мақсадлари тўлиқ барбод бўлганини кўрсатади.

Унинг фикрича, фронтдаги айрим кичик ютуқларга қарамай, Россия жуда катта йўқотишлар билан тўқнаш келмоқда, шу боис бу уруш стратегик мағлубият сифатида баҳоланиши лозим. Каво Драгоне, шунингдек, вазият операция нуқтайи назаридан тўлиқ тўхтаб қолганини таъкидлаб, «энди музокаралар вақти келди, чунки ҳар куни инсонлар ҳаёти зое кетмоқда», деди.

Адмирал НАТО Украина билан «барқарор тинчликкача» ёрдам беришни давом эттиришини билдирди. Шу билан бирга, Россиянинг эҳтимолий кейинги тажовуз нуқталари Болтиқбўйи мамлакатлари — Эстония, Латвия ёки Литва бўлиши мумкинлигини таъкидлади. Унинг сўзларига кўра, бу ҳолда НАТО Низомининг 5-моддаси ишга тушади ва коллектив мудофаа механизми, жумладан АҚШ иштироки билан, фаоллашади.

Каво Драгоне ҳозирги пайтда НАТОнинг асосий устувор вазифаси ҳаво ҳимояси эканини айтди. Россия дронларининг Полша ва Руминия ҳудудига кириши алянсни ушбу соҳани янада мустаҳкамлашга ундаган.

Путиннинг «Буревестник» қанотли ракета ва «Посейдон» ядровий торпедаси синовлари ҳақидаги баёнотларига изоҳ берар экан, адмирал НАТО бу таҳдиддан қўрқмаслигини таъкидлади: «Биз 32 давлат ва бир миллиард аҳолини ҳимоя қилишга тайёрмиз. НАТО — ядровий алянс», — деди у.