«Nvidia» H200 СИ-чиплари: Трамп рухсат берди, расмий Пекин ҳали жим — Reuters
Хитойдаги юқори талаб туфайли «Nvidia» H200 СИ-чиплари ишлаб чиқарилишини кенгайтириши мумкин. Бу чип «Nvidia»нинг харидорлар харид қилиши мумкин бўлган чиплари қаторида иккинчи ўринда туради.
«Nvidia» чип ишлаб чиқарувчи компанияси Хитойдаги мижозларига H200 СИ-чипларини ишлаб чиқариш ҳажмини ошириш имкониятини кўриб чиқаётганини маълум қилган. Бу ҳақда Reuters ўз манбаларига таянган ҳолда хабар берди.
Бу қарорга компания буюртмалар ҳажми мавжуд имкониятларидан анча юқори эканлиги сабаб бўлган. Илгари АҚШ президенти Доналд Трамп Вашингтон Хитойга ушбу чипларни экспорт қилишга рухсат беришини айтганди, аммо эндиликда Пекиннинг позицияси янги тўсиққа айланиши мумкин.
Воқеа тафсилотлари
Reuters агентлиги суҳбатдошларидан бирининг таъкидлашича, Хитой компаниялари томонидан юқори қувватли СИ-чипларга бўлган талаб шунчалик каттаки, «Nvidia» ишлаб чиқаришни кенгайтириш ҳақида жиддий ўйлаяпти. «Nvidia» бу масала бўйича Reuters сўровига изоҳ бермаган.
H200 чиплари «Nvidia»нинг аввалги авлод процессорларига тегишли бўлиб, улар 2024 йилда оммавий равишда жорий этилган. Ушбу чиплар Тайваннинг TSMC заводларида жуда чекланган ҳажмда ишлаб чиқарилади. Чунки ишлаб чиқарувчи ўз эътиборини илғор «Blackwell» ҳамда келажакдаги «Rubin» чиплари ишлаб чиқаришга қаратаётган эди.
Reuters манбаларига кўра, H200 чипларининг мавжудлиги Хитой мижозлари учун асосий муаммога айланган. Улар бу борада изоҳ олиш учун «Nvidia»га мурожаат қилишган. «Nvidia» ўтказган брифингларда компания мижозларга етказиб бериш ҳажми ҳақида маълумот берган, деди манбаладан бири, аниқ рақамларни келтирмаган ҳолда.
Воқеа контексти
Reuters манбалари ҳафта давомида хабар беришича, Хитойнинг йирик компаниялари, жумладан «Alibaba» ва «ByteDance», «Nvidia» билан H200 чипларини сотиб олиш масаласида алоқада бўлган ва катта ҳажмда буюртмалар беришга қизиқиш билдирган. Сешанба куни АҚШ президенти Доналд Трамп ҳукумат «Nvidia» компаниясига H200 процессорларини — компаниянинг иккинчи энг кучли СИ-чипларини Хитойга экспорт қилишга рухсат беришини маълум қилди. Бироқ бундай етказиб беришлар учун 25 фоизлик бож ундирилади. Шу билан бирга, яримўтказгич ишлаб чиқарувчи компанияларга 18 ой олдин ёки ундан ҳам аввал ишлаб чиқарилган технологияларни Хитойга етказишга ҳам рухсат берилади.
Бироқ Пекинга етказиб бериш масаласида аниқлик ҳали йўқ — Хитой расмийлари ҳозирча H200 импортига «яшил чироқ» ёқишмаган. Reuters маълумотларига кўра, чоршанба куни Хитойда бу масала юзасидан шошилинч йиғилишлар ўтказилган ва H200 чипларини импорт қилишга рухсат бериш ёки беришмаслик бўйича қарор кейинроқ қабул қилинади.
Хитой компанияларининг H200 чипларига юқори қизиқиши шундаки, бу ҳозирда уларда мавжуд бўлган энг юқори қувватли чип ҳисобланади. Reutersʼнинг таъкидлашича, у H20 чипига нисбатан тахминан олти баравар юқори самарадорликка эга. H20 — «Nvidia» компаниясининг Хитой бозори учун махсус тайёрлаган экспорт учун қисқартирилган чипи бўлиб, 2023 йил охирида чиқарилган.
«H200 ҳисоблаш операциялари бўйича маҳаллий илғор чипларга қараганда икки ёки уч баравар юқори самарадорликка эга, — деди Reuters’га White Oak Capital Partners инвестиция директори Нори Чиу. — Мен аллақачон кўплаб булут технологияси провайдерлари ва корпоратив мижозлар томонидан жуда катта ҳажмда буюртмалар жойлаштирилаётганини ва ҳукуматдан муайян шартлар эвазига чекловларни юмшатишни талаб қилаётганини кўряпман».
Reuters манбаларига кўра, Хитойда ўтказилган шошилинч йиғилишларда ҳар бир H200 сотиб олиш амалиётида маҳаллий чиплардан маълум миқдорда харид қилиш мажбуриятини жорий этиш таклифи ҳам муҳокама қилинган.
