Оҳангарон туманига янги ҳоким тайинланди

Ветеринария ва чорвачиликни ривожлантириш қўмитаси раиси лавозимида ишлаб келган ва Президент Шавкат Мирзиёев тегишли қарори билан 2025 йил 9 декабрь куни лавозимидан озод этилган Баҳромжон Тўраевич Норқобилов Оҳангарон тумани ҳокими эиб тасдиқланди.

Тошкент вилояти ҳокимлиги хабарига кўра, 9 декабр куни Халқ депутатлари Оҳангарон туман кенгашининг навбатдан ташқари сессияси бўлиб ўтган.

Сессияда ташкилий масала кўрилган. Туман ҳокими лавозимида ишлаб келган Дониёр Мадиримов вазифасидан озод қилинган. У 2024 йилнинг май ойида ушбу лавозимда иш бошлаганди.

Зойир Мирзаев  Оҳангарон тумани ҳокими лавозимига  Баҳромжон Норқобилов номзодини тавсия қилган.   Халқ депутатлари туман кенгаши уни туман ҳокими этиб тасдиқлаган.

Маълумот учун: Баҳромжон Норқобилов 1973 йил Қашқадарё вилоятининг Қамаши туманида туғилган. Маълумоти олий, 1995 йилда Самарқанд қишлоқ хўжалиги институтини; 2000 йилда Тошкент давлат иқтисодиёт университетини; 2003 йилда Ўзбекистон Республикаси президенти ҳузуридаги Давлат ва жамият қурилиши академиясининг Олий бизнес мактабини тамомлаган. Мутахассислиги ветеринария врачи, иқтисодчи, бизнес бошқаруви.