«Ўтин ёргани одам йўқ» — эркакларини урушда йўқотаётган рус қишлоғи

Россиянинг Узоқ Шарқида, Камчатка ўлкасида жойлашган Седанка қишлоғида 18 ёшдан 55 ёшгача бўлган эркакларнинг қарийб барчаси Украинадаги урушга кетган. Маҳаллий аҳолига кўра, бу ҳолат қишлоқ ижтимоий ва иқтисодий ҳаётига жиддий зарба берган. Бу ҳақда BBC Uzbek маълум қилди.

Седанка қишлоғи

Седанка — балиқчиликка ихтисослашган, инфратузилмаси заиф аҳоли пункти. Аксар уйларда марказий иситиш, оддий сув таъминоти ва ички ҳожатхона йўқ. Қиш фаслида ҳарорат мунтазам равишда -10 даражадан пастлайди. Туман марказига етиб бориш ёзда дарё қайиқлари ёки махсус гусеницали транспорт орқали, қишда эса моторли чана ёки вертолёт билан амалга оширилади.

Иш ўринлари чеклангани сабабли қишлоқ аҳолиси асосан балиқчилик ва шахсий хўжалик ҳисобидан кун кечиради. Маиший чиқиндилар эса ҳудуддаги Камчатка қўнғир айиқларини жалб қилади, бу эса қўшимча хавф омилларини юзага келтиради.

Яқинда эълон қилинган маълумотларга кўра, қишлоқдан чиққан Владимир Аккеев Украинадаги урушга ихтиёрий равишда кетганидан тўрт ой ўтиб ҳалок бўлган. Унинг ўлими маҳаллий аҳоли учун навбатдаги оғир йўқотиш бўлди.

BBC Жаҳон хизматига исмини ўзгартириш шарти билан интервю берган қишлоқлик Наталя сўзларига кўра, деярли ҳар бир оиладан кимдир урушга кетган. «Бу юракни эзади, қанчадан-қанча одамларимиз ҳалок бўлди. Ҳозир ўтин ёриш учун ҳам одам йўқ», дейди у.