Ўзбекистон октябрда олтиннинг дунёдаги энг йирик харидорларидан бири бўлди

Ўзбекистон октябр ойида 9 тонна олтин харид қилиб, жаҳон марказий банклари орасида энг фаол харидорлардан бири бўлди. Олтин бўйича жаҳон кенгаши маълумотларига кўра, ушбу ойда дунё марказий банклари умумий ҳисобда 53 тонна олтин сотиб олди ва бу жорий йилда қайд этилган энг юқори ойлик кўрсаткични ташкил этди.

Полша ва Бразилия 16 тоннадон харид қилиб биринчи ўринларни эгаллади, Ўзбекистон эса учинчи ўриндан жой олди. Индонезия 4 тонна, Туркия 3 тонна, Чехия ва Қирғизистоннинг марказий банклари 2 тоннадон олтин қўшди. Гана, Хитой, Қозоғистон ва Филиппин ҳам бир тоннаддан ортиқ захира тўплади. Фақат Россия Марказий банки олтин захиралари 3 тоннага камайганини маълум қилди.

Жорий йил бошидан октябргача жаҳон марказий банклари жами 254 тонна олтин сотиб олди. Бу ўтган уч йилга нисбатан камроқ бўлса-да, таҳлилчилар буни олтиннинг юқори нархи билан изоҳламоқда. Шунга қарамай, ривожланаётган мамлакатлар томонидан барқарор талаб сақланиб, олтинга бўлган стратегик қизиқиш янада кучаймоқда.

Жаҳон кенгашининг сўров натижаларига кўра, марказий банкларнинг 95 фоизи 2026 йилда жаҳон бўйлаб олтин захиралари ўзгармай ўсишини кутишини билдирган. Йил бошидан буён Полша 83 тонна билан энг йирик харидор бўлиб турибди, Қозоғистон 41 тонна билан иккинчи ўринда.

Ўзбекистон соф сотиш бўйича (10 тоннадан сал кўпроқ) Сингапурдан кейин иккинчи ўринда туради.

Ўзбекистоннинг олтин экспорти ҳам сезиларли ошди. Йилнинг 10 ойида мамлакат 9,9 миллиард долларлик олтин экспорт қилиб, ўтган йилнинг мос даврига нисбатан 1,5 баробар кўп кўрсаткичга эришди. Олтин умумий экспорт таркибининг 37,1 фоизини ташкил этди. Октябр якунида халқаро захиралар 60 миллиард долларга яқинлашиб, тарихий рекорд янгиланди. Бу ўсиш асосан олтин нархининг қимматлаши ҳисобига таъминланган, чунки захираларнинг асосий қисми айнан ушбу металга тўғри келади.