Ўзбекистонда «прописка» тартиби янгиланди

Ўзбекистонда фуқароларни яшаш ва турган жойи бўйича рўйхатдан ўтказиш ҳамда рўйхатдан чиқариш тартиби янгиланди. Бу ҳақда ҳукуматнинг 2026 йил 5 майдаги қарори билан тегишли низом тасдиқланди.

Янги тартибга кўра, рўйхатдан ўтиш жараёнида фуқаро ва уй-жой мулкдорининг иштирок этиши шарт ҳисобланади. Уларнинг розилиги Face-ID ёки Mobile-ID тизимлари орқали рақамли тарзда тасдиқланади. Бу эса инсон омилини қисқартириш ва жараён шаффофлигини таъминлашга қаратилган.

Низомга мувофиқ, ички ишлар органларининг миграция ва персоналлаштириш бўлинмалари мазкур соҳада ваколатли орган сифатида белгиланди. Фуқаролар рўйхатдан ўтиш учун ушбу органларга, давлат хизматлари марказларига ёки «Ақлли миграция» шохобчаларига мурожаат қилиши мумкин.

Шу билан бирга, фуқароларга онлайн хизматлардан фойдаланиш имконияти ҳам яратилди. Хусусан, Ягона интерактив давлат хизматлари портали ҳамда «E-xabar berish» тизими орқали масофадан туриб ариза юбориш мумкин.

Янги қоидаларга кўра, бир нечта уй-жойга эга бўлган мулкдор фақат битта манзилда доимий рўйхатдан ўтиши мумкин. Вояга етмаган фуқаролар эса ота-онаси ёки васийси рўйхатда турган манзил бўйича автоматик тарзда рўйхатга олинади.

Шунингдек, фуқаро янги манзилга кўчиб келганидан сўнг 10 иш куни ичида рўйхатдан ўтиши шарт. Уй-жой мулкдори эса бу ҳақда ваколатли органни хабардор қилиши лозим.

Ҳужжатда алоҳида таъкидланишича, фуқарони муайян манзилга рўйхатга қўйиш унга ушбу уй-жойга нисбатан мулк ҳуқуқини бермайди. Бундан ташқари, айрим ҳудудларда — чегара зоналари, ёпиқ ҳарбий шаҳарчалар ва фавқулодда ҳолат жорий этилган ҳудудларда фуқароларнинг эркин ҳаракатланиши чекланиши мумкин.