Путин ярадор аскарларга уруш яхши кетаётганини айтиб, мақтанди

Россия президенти Владимир Путин ҳарбийлар туғилган кунига совға қилган иконалар [православ муқаддас расмлари]ни олиб, ҳарбий шифохоналардан бирига яраланган россиялик аскарларни кўргани борди.

Ташриф чоғида Путин Украина билан фронт чизиғидаги вазият «Россия фойдасига ривожланаётганини» таъкидлади.

Унинг айтишича, Купянск ва Покровск ҳудудларида Украина қўшинлари гўёки қамалда ва қуршовда қолган. Путин Россия қўшинларининг ҳаракатлари «мамлакатнинг узоқ муддатли хавфсизлигини таъминлашга қаратилганини қўшимча қилди».

Шунингдек, Россия президенти, Россия қўшинлари фронтнинг барча қисмларида «олға силжиётгани ва фаол ҳаракат қилаётганини, олд чизиқдагиларнинг барчаси эса қаҳрамонларча жанг қилаётганини» айтди.

Путин «Буревестник» ракета мажмуасига алоҳида эътибор қаратди. Унинг сўзларига кўра, бу мажмуа ноёб ядро қурилмаси билан жиҳозланган бўлиб, унинг ҳажми атом сув ости кемаси реактори ҳажмидан минг баравар кичик ва уни дақиқалар ва сониялар ичида ишга тушириш мумкин.

Путин, шунингдек, «Буревестник»да қўлланилган технологияларни «ой дастурида ва халқ хўжалигида қўллаш» режалаштирилаётганини маълум қилди. У яна Россия Федерацияси кеча «Посейдон» сув ости ядро қурилмасини синовдан ўтказганини қўшимча қилди.

«Буревестник» мутлақ устунликларга эга ва ватандош олимларимиз билан фахрланишга арзигулик», - деди у.

Путин Россия ҳарбийлари журналистларни, шу жумладан хорижий ва украиналик журналистларни Украина қўшинлари қуршовда қолган ҳудудга киритишга тайёр эканини билдирди.

Маълумот учун, илгари Россия президенти «Буревестник» ракетасининг «асосий синов босқичлари якунланганини» эълон қилганди. Унинг сўзларига кўра, «ҳал қилувчи синовлар якунланди» бироқ «янги қуролни Россия Қуролли Кучлари жанговар навбатчилигига қўйиш учун ҳали зарур тартибга солиш ишлари амалга оширилиши керак». АҚШ президенти Доналд Трамп ушбу маълумотни шарҳлар экан, Путин ядро қурилмали ракета синовларини ўтказиш ўрнига урушни тугатиши кераклигини таъкидлади.