Реклама қонунчилигини бузган 3 компания жаримага тортилди
Жаримага тортилган 3 компания ташқи реклама ва уй-жой тарғиботида қонунчилик талабларига амал қилмаган.
© Yakkasaroy tumani hokimligi matbuot xizmatiБухоро, Самарқанд ва Тошкент вилоятларида учта компания ташқи реклама ва ахборот тарқатишда белгиланган талабларга амал қилмагани аниқланди. Бу ҳақда Рақобат қўмитаси хабар берди.
Маълумотларга кўра, Бухоро вилоятида фаолият юритаётган “ORIENT SPARKLE” МЧЖ Бухоро шаҳридаги Б.Нақшбанд кўчаси йўл ёқасида реклама жойининг паспорти мавжуд бўлмаган ташқи реклама объектини жойлаштиргани маълум бўлган.
Самарқанд вилоятида эса “Sam-Ros-Stroy” МЧЖ бинонинг олд қисми ҳамда давлат мулки ҳисобланган ер участкасида ташқи реклама ўрнатиш учун тегишли рухсатнома олмасдан реклама жойлаштирган. Шунингдек, реклама матнларида давлат тилига оид талаблар ҳам тўлиқ сақланмаган.
Тошкент вилоятидаги “Glamur Gold” МЧЖ фаолияти ўрганилганда, компания ижтимоий тармоқлар ва қурилаётган уй-жой мажмуаси ҳудудида кўп квартирали уйлар рекламасини тарқатгани маълум бўлган. Бироқ Қурилиш ва уй-жой коммунал хўжалиги вазирлиги маълумотига кўра, мазкур компания улуш киритиш асосида уй-жой қуриш жараёнларини тартибга солувчи электрон платформада қурилиш-пудрат ташкилоти сифатида рўйхатдан ўтмаган.
Бундан ташқари, компания томонидан тарқатилган рекламада ҳақиқатга мос келмайдиган маълумотлар берилиб, амалда қуриб битказилган уйлар рекламаларда кўрсатилган ҳолатдан фарқ қилиши аниқланган. Бу эса нотўғри ва чалғитувчи реклама тарқатилганини кўрсатади.
Аниқланган ҳолатлар юзасидан Рақобат Қўмитасининг ҳудудий бошқармалари махсус комиссиялари томонидан “ORIENT SPARKLE”, “Sam-Ros-Stroy” ва “Glamur Gold” МЧЖларга нисбатан ишлар қўзғатилган. Компанияларга молиявий жарималар қўлланилиб, қонунбузилишларни бартараф этиш ҳамда келгусида бундай ҳолатларга йўл қўймаслик бўйича мажбурий кўрсатмалар берилган.
