Сенатор Грэҳэм: «Санкциялар Трампга Украинадаги урушни тўхтатиш имконини беради»
АҚШда Россия ва уни қўлловчи давлатларга нисбатан «жуда қатъий» санкциялар жорий этилиши режалаштирилмоқда.
АҚШнинг республикачи сенатори Линдси Грэҳэм Конгрессда Россияга қарши янги икки партия томонидан ҳам қўллаб-қувватланадиган санкциялар қонуни ишлаб чиқилаётганини маълум қилди. Унга кўра, янги ҳужжат президент ваколатларини кенгайтиради ва Россия ҳамда унинг савдо ҳамкорларига босим ўтказиш учун янги иқтисодий воситалар тақдим этади.
Грэҳэмнинг таъкидлашича, қонун лойиҳаси орқали АҚШ Россия иқтисодиётини қўллаб-қувватлаётган мамлакатларга нисбатан «иккиламчи санкциялар ва тарифлар» жорий этиши мумкин бўлади. Бу эса Владимир Путинни музокаралар столига ўтиришга мажбур қилади, деган фикрда сенатор.
«Бу қонун Трампга Путин ва унинг иттифоқчиларига кучлироқ босим ўтказиш имконини беради», — деган Грэҳэм.
Унинг сўзларига кўра, Россиянинг йирик нефт компанияларига қарши жорий қилинган аввалги санкциялар сезиларли натижа берган. Янги қонун эса шу жараённи давом эттириб, урушни «шараф билан, адолатли ва бутунлай тугатиш» имконини беради.
Аввалроқ АҚШ президенти Доналд Трамп ҳам ушбу ташаббусни қўллаб-қувватлаб, Россия билан бизнесни давом эттираётган ҳар қандай давлатга қарши «жуда қатъий санкциялар» қонуни тайёрланаётганини маълум қилган эди.
