«SpaceX» IPOsi Ilon Maskni dunyodagi birinchi va yagona trillionerga aylantirishi mumkin

Ilon Mask dunyodagi birinchi trillioner maqomiga erishishdan bir qadam qoldi. Agar uning «SpaceX» kompaniyasi IPO orqali 2 trillion dollarlik baholanishga chiqsa, biznesmenning umumiy boyligi 1,1 trillion dollargacha oshishi mumkin. Hatto 1,75 trillion dollarlik nisbatan kamroq ssenariyda ham, Mask «Tesla» va boshqa aktivlardagi ulushi hisobiga trillion dollarlik chegarani kesib o‘tadi, deb yozadi «Bloomberg». 

Agentlik ta’kidlashicha, bu holat unga boshqa barcha milliarderlardan keskin uzilish imkonini beradi va Mask bir necha yil davomida dunyodagi eng boy inson bo‘lib qolishi mumkin. 1,1 trillion dollarlik holatda u reytingda ikkinchi o‘rinda turgan Larri Peyjdan (328 mlrd dollar) uch barobardan ham ko‘proq boy bo‘ladi.

«Forbes» ma’lumotlariga ko‘ra, hozirda Maskning boyligi 807,7 milliard dollar atrofida baholanmoqda.
Ma’lumotlarga ko‘ra, Maskning boyligi o‘sishida asosiy omil uning «SpaceX»dagi ulushi hisoblanadi: IPO prospektiga ko‘ra, unga kompaniyaning taxminan 5,1 milliard aksiyasi tegishli. Shuningdek, unda «SpaceX» aksiyalarini sotib olish uchun taxminan 350 million opsion ham mavjud.

«Bloomberg» hisob-kitoblariga ko‘ra, «SpaceX» hozirda taxminan 1,03 trillion dollarga baholanmoqda. Bu 2025-yil oxiridagi investitsiya raundi natijalari va «xAI» qiymati asosida shakllangan. «The Wall Street Journal» esa «xAI» qo‘shilganidan keyin «SpaceX» bahosi 1,25 trillion dollarga yetganini xabar qilgan.
 
«Mars yoki hech narsa» paketi

«SpaceX» tomonidan AQSH Qimmatli qog‘ozlar va birjalar komissiyasiga (SEC) taqdim etilgan IPO prospekti kompaniya asoschisi Ilon Mask uchun tayyorlangan rag‘batlantirish paketi shartlarini ham ochib berdi.

Eng yirik bonus paketi Maskka «SpaceX»ning 1 milliard aksiyasini olish huquqini beradi – agar kompaniya kapitalizatsiyasi 7,5 trillion dollardan oshsa. Bu hajm dunyodagi barcha kompaniyalardan yuqori hisoblanadi. Biroq faqat kapitalizatsiyaning o‘sishi yetarli emas: «SpaceX» avval Marsda doimiy koloniya yaratishi kerak bo‘ladi, u yerda kamida 1 million kishi yashaydi.

Yana bir bonus paketi Maskka 300 milliondan ortiq aksiya sotib olish huquqini beradi. Bu bonusni olish uchun kompaniya kapitalizatsiyasi 6,6 trillion dollarga yaqin darajalarga yetishi kerak. Shu bilan birga, «SpaceX» Yer tashqarisida data-markazlar qurishi ham shart qilinadi. Ularning hisoblash quvvati yillik 100 teravatt deb belgilangan.

Keyingi bosqich

«The Wall Street Journal» ma’lumotiga ko‘ra, «SpaceX» IPO prospekti e’lon qilinganidan 15 kun o‘tib, 4-iyundan boshlab investorlar bilan uchrashuvlarni boshlaydi. Birjaga chiqish esa 12-iyunga rejalashtirilgan.

Aksiyalar «Nasdaq» birjasida SPCX tikeri ostida savdoga chiqishi kutilmoqda. IPO tarixdagi eng yirik bitim bo‘lishi mumkin: «SpaceX» kamida 80 milliard dollar jalb qilishni rejalashtirmoqda – bu «Saudi Aramco» tomonidan o‘rnatilgan rekorddan uch barobar ko‘p.