Тимур Ишметов: «Биз иккиламчи санкцияларга тушмасликка қаттиқ эътибор қаратяпмиз»

24 октябр куни Марказий банкда бўлиб ўтган матбуот анжуманида Марказий банк раҳбари Тимур Ишметов АҚШ Молия вазирлигининг Хорижий активларни назорат қилиш бошқармаси (OFAC) томонидан Россиянинг «Лукойл» ва «Роснефт» компанияларига нисбатан жорий этилган санкцияларнинг Ўзбекистонга эҳтимолий таъсири ҳақида фикр билдирди.

«Ҳар қандай санкция қўллангандан кейин одатда бошқа учинчи давлатларга таъсир қилмайдиган шароит яратиш бўйича доим музокаралар ўтказилади. Мен аминманки, худди шундай амалга оширилади ва умид қиламизки, юқори таъсири бўлмаслиги керак» — деди Тимур Ишметов.

Марказий банк раиси таъкидлашича, мамлакат банк сектори санкция хавфларини олдини олиш бўйича қатъий назоратни амалга оширмоқда. «Банкларимиз амалиётларида санкцияланган товарлар, ташкилотлар ёки банклар билан ишламаслик ҳақида аниқ позицияга эгамиз ва буни қатъий кузатиб борамиз. Шу сабабли, ҳозиргача биронта банк санкцияга учрагани йўқ. Биз бу йўналишда қатъийликни сақлаймиз», — деди у.

Ишметовнинг сўзларига кўра, Ўзбекистон томони иккилламчи санкция хавфини жиддий таҳлил қилади ва ҳар бир операцияни мониторингдан ўтказади. Бу мамлакат молия тизими барқарорлигини сақлаш ҳамда халқаро молия муносабатларида ишончни таъминлашга хизмат қилади.

Маълумот учун, АҚШнинг OFAC бошқармаси «Лукойл» ва «Роснефт» компанияларига нисбатан урушни тугатиш бўйича «Россиянинг сиёсий иродаси етишмаётгани» сабабли санкциялар жорий этди. Чекловлар бу компанияларнинг жами 34 та шўъба корхоналарига ҳам татбиқ этилган: шуларнинг 28 таси «Роснефт»га, 6 таси эса «Лукойл»га тегишли.

Эслатиб ўтамиз, Европа Иттифоқи Марказий Осиёнинг бир нечта банкларига санкция киритган эди.