Тоғ-кон саноати ҳажми маълум қилинди

2026 йил январ–март ойларида Ўзбекистонда саноат ишлаб чиқариши таркибида энг катта улуш ишлаб чиқариш саноати ҳиссасига тўғри келди. Миллий статистика қўмитаси маълумотларига кўра, мазкур йўналишда ишлаб чиқариш ҳажми 246,1 трлн сўмни ташкил этган.

Секциялар бўйича саноат ишлаб чиқариши ҳажми қуйидагича:

Ҳисоботда қайд этилишича, тоғ-кон саноати ва очиқ конларни ишлаш соҳасида ҳам ижобий динамика сақланиб қолган. Биринчи чорак якунига кўра, соҳадаги ишлаб чиқариш ҳажми 20,3 трлн сўмга етган. Йиллик ўсиш суръати эса 4,1 фоизни ташкил қилган.

Электр энергияси, газ, буғ билан таъминлаш ва ҳавони кондициялаш соҳасида ишлаб чиқариш ҳажми 21,3 трлн сўм бўлган. Ушбу тармоқда ўсиш 3,1 фоиз даражасида қайд этилди. Мутахассислар буни мамлакатда энергия истеъмолининг ортиши ва инфратузилма лойиҳалари билан изоҳламоқда.

Шунингдек, сув билан таъминлаш, канализация тизими, чиқиндиларни йиғиш ва утилизация қилиш соҳасида 1,6 трлн сўмлик хизмат ва маҳсулотлар ишлаб чиқарилган. Бу йўналишда ўсиш суръати 8,5 фоизни ташкил этган.

Таҳлилчилар фикрича, саноат тармоқларидаги ўсиш иқтисодий фаолликнинг тикланаётгани ҳамда ички талаб юқори сақланаётганини кўрсатмоқда. Айниқса, ишлаб чиқариш саноати мамлакат иқтисодиётида асосий улушни сақлаб қолмоқда.