Тошкентда қотил хотин 13 йилга, ўғил эса 15 йилга қамалди
Жиноят ишлари бўйича Сергели туман судида ўз турмуш ўртоғининг қотилига айланган аёл ва унинг ўғлига суд ҳукми ўқилди. Аёл ўғли билан олдиндан тил бириктириб 55 ёшли эрини, аввалига ток урдириб, сўнгра бўғиб ўлдирган.
Пойтахтнинг Сергели туманида яшовчи аёл 55 ёшли эрини ўғли билан олдиндан тил бириктириб, аввалига ток урдириб, сўнгра бўғиб ўлдирди. Мазкур жиноят иши ЖИБ Сергели туман судида судя Ойбек Қаҳҳоров раислигида кўриб чиқилди. Қотилликка эрнинг бошқа аёл билан яқин муносабатда бўлиб юрганлиги ва узоқ йиллардан буён давом этиб келаётган оилавий низолар сабаб бўлган.
Қотиллик содир бўлган куни аёл Р.Ж. турмуш ўртоғини ўғли Р.М. билан бирга зиёфатга таклиф қилиб, спиртли ичимлик ичирган. Маст ҳолдаги эри А.М. ни ҳаётидаги бошқа аёлга уйининг ярмини бериб юбормаслиги учун ток урдириб, ўлдиришга уринган. Сўнгра бўғиб ўлдиради. Она-бола жасадни йўқотиш учун аёлнинг Тракcер автомобилига ортиб, Сергели туманининг “Халқобод” маҳалласи ҳудудидан оқиб ўтувчи “Қорасув” каналининг аэропорт девори томонида қамишлар орасига ташлаб қайтади. Икки кундан сўнг Ички ишлар бўлимига хабар бериб, эри бедарак йўқолганини айтади.
Суд тиббий экспертиза хулосасига кўра, марҳум А.М. нинг ўлими “бўйин аъзоларини қаттиқ ўтмас жисм билан бўғилишидан келиб чиққан механик асфексиядан юз берганлиги, унда қалқонсимон тоғай ўнг юқориги шохи юқори учлигидан тўлиқ кўндаланг синиши аниқланган. Ушбу жароҳат ҳаётийлигида, ўлимидан олдин қаттиқ ўтмас жисм таъсирида ҳосил бўлганлиги, оғирлик даражасига кўра одатда тирик шахсларда ушбу жароҳатни механик асфексия билан асоратланиши оғир тан жароҳатлари тоифасига киришлиги ҳамда ўлим юз бериши билан тўғридан-тўғри боғлиқдалиги кўрсатилган. Шунингдек, марҳумнинг миясида 3,18 промилле миқдорида этил спирти мавжудлиги аниқланган.
Прокурор суддаги музокара нутқида судланувчи аёлни 13 йил-у 4 ой муддатга, судланувчи ўғилни 17 йилга озодликдан маҳрум қилиш жазосига ҳукм қилиш, тайинланган жазони умумий тартибли колонияда ўташни белгилашни сўради.
Жабрланувчининг қонуний вакили музокарада судланувчиларни умрбод қамоқ жазосига ҳукм қилишни айтди. Судланувчи эркакнинг адвокати ҳимояси остидаги шахснинг қилган ишига тўлиқ иқрорлиги ва 3 нафар вояга етмаган фарзанди борлигини ҳисобга олиниб, унга енгилроқ жазо тайинланишини сўради.
Судланувчи аёл Р.Ж. қилган ишидан пушаймонлиги айтиб, суддан кечиришни сўради. Судланувчи эркак Р.М. қилган ишидан афсусдалигини билдириб, суддан кечиришни ва оқилона қарор қабул қилишни билдирди.
Судланувчилар айбдор деб топилиб, қотил хотин Р.Ж. 13 йилга, ўғил Р.М. эса 15 йилга қамалди. Тайинланган жазони умумий тартибли колонияда ўташи белгиланди.
Бахтиёр Тўхтаев, Vaqt.uz мухбири
Оператор: Низомжон Аҳмедов
