Трамп Венесуэлага қарши қуруқликда зарбаларни эълон қилди

АҚШ президенти Доналд Трамп Венесуэладаги наркокартелларига қарши қуруқликда ҳарбий амалиётлар бошланишини эълон қилди. У бу ҳақда 1980 йилги АҚШ эркаклар хоккей терма жамоаси аъзоларига медаллар топшириш маросимида сўзлаган нутқида айтди.

Трампнинг таъкидлашича, АҚШ денгиз орқали олиб кирилаётган наркотикларнинг 96 фоизини тўхтатишга эришган. Энди эса асосий эътибор қуруқликдаги каналларга қаратилади. Унинг сўзларига кўра, зарбалар нафақат Венесуэлага, балки «наркотик олиб кириб, одамларни ўлдираётган барча ёмон гуруҳлар»га қаратилган бўлади.

Сўнгги ойларда АҚШ Кариб денгизи ҳавзасида ҳарбий фаоллигини ошириб, наркотрафикка алоқадор, деб ҳисобланган кемаларга зарбалар бериб келмоқда. Ноябр ойи охирида Трамп Венесуэла устида ҳаво ҳудуди ёпилганини эълон қилган, кейинчалик эса бу қарор тўғридан тўғри ҳарбий зарбаларни англатмаслигини айтган эди.

Венесуэла Ташқи ишлар вазирлиги мазкур баёнотларни БМТ низомига зид равишда куч ишлатиш билан таҳдид сифатида баҳолади. Шу ҳафта Трамп Венесуэла соҳиллари яқинида нефт ташувчи танкер ушлаб қолинганини ҳам маълум қилди. Reuters ва The New York Times маълумотларига кўра, АҚШ Венесуэла нефтини ташаётган бошқа танкерларни ҳам тўхтатишни режалаштирмоқда.

Бу ҳаракатлар Вашингтоннинг Венесуэла президенти Николас Мадурога босимни кучайтириш стратегиясининг бир қисми сифатида қаралмоқда.

Трамп аввалроқ Мадуронинг ҳукмронлиги поёнига етаётганини айтган эди. Венесуэлада ҳарбий сафарбарлик эълон қилинган. Мадуро АҚШни тинчликка чақирмоқда. The Wall Street Journal нашрининг маълумотига кўра, октябр ойи охирида Трамп Венесуэла етакчиси билан суҳбатда агар Мадуро лавозимини ўз ихтиёри билан тарк этмаса куч ишлатишга тайёр эканини билдирган. Венесуэла президенти эса 3-4 йилдан сўнг лавозимидан истеъфога чиқишини айтган, бироқ Вашингтонни бу қониқтирмаган.