Венесуэла нефт ишлаб чиқаришини оширади, бу эса нархларга босим ўтказади
АҚШнинг Венесуэлада амалга оширган ҳарбий амалиёти ва президент Николас Мадуронинг қўлга олинишидан сўнг мамлакатда нефт ишлаб чиқариш ҳажми босқичма-босқич ошиши мумкин. .
АҚШ кучлари дам олиш кунлари Каракасда Венесуэла президенти Николас Мадурони қўлга олган. АҚШ президенти Доналд Трамп Вашингтон нефт ишлаб чиқарувчи мамлакат устидан назоратни қўлга олишини маълум қилиб, Венесуэла нефтига нисбатан жорий этилган эмбарго сақланиб қолишини таъкидлаган.
Лондонда жойлашган Energy Institute маълумотларига кўра, Венесуэла жаҳон нефт захираларининг тахминан 17 фоизига эга бўлиб, бу 303 млрд баррелни ташкил этади. Бу кўрсаткич бўйича мамлакат ҳатто OPEC етакчиси Саудия Арабистонидан ҳам олдинда туради.
Тарихий маълумотларга кўра, 1970-йилларда Венесуэлада нефт ишлаб чиқариш кунига 3,5 млн баррелгача етган бўлиб, бу ўша даврда жаҳон ишлаб чиқаришининг 7 фоизидан ортиғини ташкил этган. 2010-йилларга келиб ушбу кўрсаткич 2 млн баррелдан пастга тушди. 2025 йилда эса мамлакат ўртача кунига 1,1 млн баррел нефт ишлаб чиқарган бўлиб, бу жаҳон ҳажмининг атиги 1 фоизига тенг.
«JPMorgan» таҳлилчилари Наташа Канева раҳбарлигида тайёрланган ҳисоботда сиёсий ўтиш даври юз берса, Венесуэла нефт ишлаб чиқаришни икки йил ичида 1,3–1,4 млн баррелгача ошириши мумкинлиги айтилган. Уларнинг баҳосига кўра, кейинги ўн йил ичида ишлаб чиқариш ҳажми 2,5 млн баррелгача етиши эҳтимолдан холи эмас. Айни пайтда эса реал ишлаб чиқариш кунига тахминан 800 минг баррел атрофида.
Таҳлилчиларнинг таъкидлашича, ушбу омиллар ҳозирча нефт фючерслари бозорининг узоқ муддатли қисмларида тўлиқ акс этмаган.
«Goldman Sachs. таҳлилчилари эса Венесуэлада ишлаб чиқариш тикланиши эҳтимоли борлигини тан олган ҳолда, бу жараён секин кечиши ва катта инвестицияларни талаб қилишини қайд этган. Уларнинг ҳисоб-китобига кўра, агар Венесуэла нефт ишлаб чиқаришни кунига 2 млн баррелга етказса, 2030 йилга бориб нефт нархлари ҳар баррел учун тахминан 4 долларга арзонлаши мумкин.
Қисқа муддатда эса Венесуэлада нефт ишлаб чиқариш истиқболи АҚШнинг санкциялар сиёсати қандай ўзгаришига боғлиқ бўлади. «Goldman Sachs» бу масалада нефть нархлари учун ноаниқ, бироқ чекланган хавфлар мавжудлигини таъкидламоқда.
Шу билан бирга, «Goldman Sachs» 2026 йил учун нефт нархлари бўйича прогнозларини ўзгартирмади. Бунда «Brent» нефтининг ўртача нархи баррелига 56 доллар, WTI нефти эса 52 доллар бўлиши кутилмоқда. Венесуэлада эса 2026 йилда нефт ишлаб чиқариш ҳажми кунига 900 минг баррел даражасида қолиши прогноз қилинган.
