Володимир Зеленский: Лукашенко урушдаги ҳаракатлари учун жавоб беради

Украина президенти Володимир Зеленский Александр Лукашенкога нисбатан кескин баёнот билан чиқди. Унинг сўзларига кўра, Беларус раҳбари 2022 йилдаги кенг кўламли уруш бошланишида Россия қўшинларига ўз ҳудудини очиб бергани учун жавоб беради.

«У ҳозир оммавий ахборот воситаларида жуда «ширин» гапирмоқда, ўзини украин халқига меҳрибон қилиб кўрсатмоқда. Аммо биз унинг «меҳри»ини тонгги соат 4 да бомбалар билан ҳис қилиб бўлганмиз. Агар у сўзлари билан бизнинг эсимиздан чиқармоқчи бўлаётган бўлса, унда хато қилмоқда — биз барчасини жуда яхши эслаймиз», — деди Зеленский 7 ноябр куни ўтказилган брифингда.

Украина раҳбари Беларус ҳудудидан туриб Киевга ҳужум бошланганини эслатиб, у ердан дастлаб ракета ва танклар кириб келганини таъкидлади. Унга кўра, ҳеч ким бу нарсалар унутилаади, деб ўйламаслик керак. «У қилган ишлари учун албатта жавоб беради», — деди Зеленский.

Украина президенти, шунингдек, Беларус иштирокида тинчлик музокараларини ўтказиш имкониятига қарши чиқди. Унга кўра, Беларус ушбу урушнинг иштирокчиси сифатида қолмоқда ва бетарафлик ниқобига яширина олмайди.

6 ноябрь куни Александр Лукашенко Украинадаги урушдан афсусдалигини билдириб, украиналикларни Беларусга таклиф қилган эди. Унинг сўзлари украин расмийлари ва жамоатчилиги томонидан қалбаки ва популистик ҳаракат сифатида баҳоланди.