Хитой G7 давлатлари айбловини рад этди
Мамлакат ташқи ишлар вазири G7 вазирларининг хулосаларини «ХХРнинг ички ишларига аралашиш» деб баҳолади ва уларнинг «фактларни эътиборсиз қолдириб, ҳақиқатни бузиб кўрсатаётганини таъкидлади.
Хитой Украинадаги уруш томонларига ҳеч қачон қурол етказиб бермаганини айтиб, G7’нинг Россияни қўллаб-қувватлаш тўғрисидаги айбловларини рад этди.
Хитой Ташқи ишлар вазирлиги G7 давлатлари ташқи ишлар вазирларининг баёнотидан сўнг қаттиқ танқид билан чиқди. У Пекин Украинадаги урушнинг ҳеч бир томонига ҳеч қачон қурол етказиб бермаганини маълум қилди.
Шунингдек, Хитой G7’нинг можаронинг ривожланишида мамлакатни айблаш уринишларига тоқат қилмаслигини билдирди. Бу баёнотни Хитой Ташқи ишлар вазирлиги расмий вакили Лин Сзян эълон қилди.
G7 ташқи ишлар вазирлари илгари Россияга Украинада уруш олиб боришда ёрдам бераётган давлатларга босимни кучайтириш зарурлигини қўллаб-қувватлаганди.
Ҳужжатда улар КХДР ва Эроннинг Москвага ҳарбий ёрдам кўрсатишини қоралаган. Шунингдек, унда Хитойдан қурол-яроғ ва икки мақсадли маҳсулотлар етказиб берилаётгани кўрсатилган. G7 фикрига кўра, Пекин урушнинг давом этишига кўмаклашаётган «ҳал қилувчи омил» ҳисобланади.
Хитой Ташқи ишлар вазирлиги ҳужжат яна фактларни эътиборсиз қолдираётганини маълум қилди. Пекиннинг таъкидлашича, у ҳақиқат ва ёлғонни бузиб кўрсатмоқда. Хитой томони, шунингдек, ҳужжат Хитойни атайлаб обрўсизлантириши ва мамлакатнинг ички ишларига қўполлик билан аралашаётганини айтди.
Хитой раҳбари Си Жинпиннинг АҚШ президенти Доналд Трамп билан яқинда ўтказилган учрашувида Украинадаги вазият муҳокама қилинганди. Трампнинг айтишича, Хитой ва АҚШ урушни тўхтатиш учун биргаликда ҳаракат қилмоқда. Шу билан бирга, у можаро динамикасини шарҳлаётиб, «баъзида уларга жанг қилишларига имкон бериш кераклигини» таъкидлади.
Шунингдек, Доналд Трамп Россиянинг Украинага қарши урушини якунлай олишини даъво қилмоқда. Унинг сўзларига кўра, Москва Қўшма Штатлар билан «бизнесда ҳамкорлик қилишни» хоҳлайди.
