«Яланғочликни дунёвийлик деб қабул қилдик, энди ёпиниб юриш ҳуқуқига дахл қилмасликни ҳам ўрганайлик» – Алишер Қодиров

Партия раиси ўз телеграм каналида улашган постида Ўзбекистоннинг дунёвий давлат эканини таъкидлаб, «Дунёвий давлат кўпчилик сайлаган Парламент томонидан қабул қилиниб, кўпчилик сайлаган Президент томонидан мақулланган қонунларни бузмаган ҳолда, ўзи истаганидек яшаш имконини беришини таъкидлади.

«Ватанимизда барча миллат ва дунёқарашдаги ватандошлар эмин-эркин, қонунларни бузмаган ҳолда фаровонликка интилиши учун шароит яратиш устувор мақсад эканлиги мустаҳкам белгиланган. Ҳамма тенг ва ҳеч ким камситилмаслиги кафолатланган. Агар бирон ватандош пиво ичмоқчи бўлса, ичади, бу унинг танлови, ичмайдиган ватандош ичмайди ва бунинг сабабини ҳар икки тоифа ҳеч кимга изоҳ беришга мажбур эмас. Алкоголни ичиш мумкин, лекин реклама қилиш мумкинмас, бу амалдаги қонунда белгиланган, албатта, парламент сайловларини мутлақо ютадиган бирор сиёсий куч қонунни ўзгартириб алкоголни “миллий қадрият”, бир жинслиларни оила қуриш талабини эса эркин танлов сифатида норма қилиши ҳам мумкин, бунга сиз ҳуқуқ берасиз», – деб ёзди у.

Қодировнинг ёзишича, Женифер Лопеснинг концерти сердаромад иш ва ёпиқ тадбир, наркотика тарқатиб, давлатга қарши тарғибот қилмаса, ўтказилади, танасини кўрсатиш уни танлови, кўриш эса тадбирга билет олганларники, дунёвийлик шу. Шунингдек, у ўраниб юрмоқчи бўлган аёл ватандошни ҳам танлови қонун билан ҳимоя қилиниши кераклигини таъкидлади.

«Ялонғоч намойишини дунёвийлик деб қабул қилдик, энди ёпиниб юриш ҳуқуқига ҳам дахл қилмаслик кераклигини қабул қилайлик. Лопесга қандай кийинишни ўргатмаганимиздек, эътиқодли аёлларимизга рўмолни қандай ўрашни ўргатишни, қолаверса, шу ёшга келиб эътиқоди талабига риоя қилган аёлларни паспортга рўмолини ечиб тушишга мажбурлашни ҳам тўхтатиш керак. Идентификация талаблари юзни очиқ бўлишини тақозо қилади, сочни эмас. Лопесга кўрсатган бағрикенглигимизни диндор аёлларимизга ҳам кўрсатайлик. Дунёвийлик ишонганга ҳам, ишонмаганга ҳам тенг бўла олиш дегани, зўрни заифга ҳаётдан дарс бериши эмас. Лопес рақсини тушуниш учун Маркесни дунё фалсафасини ўқиган бўлиш керак», – деб ёзди Ўзбекистон “Миллий тикланиш” демократик партияси раиси Алишер Қодиров.