Яна бир қурилишда можаро: «Strong Cities» 200 кишидан 5 млрд сўм олиб, ғойиб бўлган

Янги уй учун тўлов қилиб, белгиланган муддатда тураржойга эга бўлолмаган ва пуллари ҳам қайтариб берилмаган фуқароларнинг норозиликлари акс этган видеотасвирлар ижтимоий тармоқларда тарқалмоқда. Улар «Strong Cities» компаниясига умумий ҳисобда 5 млрд сўм тўлаб, ҳали қурилиши тугалланмаган уйлардан квартира олмоқчи бўлишган. Аммо уларнинг иддаосига кўра, қурилиш ишлари тўхтатилган, компания эгалари эса ғойиб бўлган. Қурилиш ва уй-жой коммунал хўжалиги вазирлиги матбуот хизматининг Vaqt.uz' га маълум қилишича, «Strong Cities» МЧЖ Тошкент шаҳри Олмазор туманидаги Чилтўғон маҳалласи, Уста Олим 2-берк кўчасида қурилиш ишларини амалга оширилган. Бироқ ушбу объект бўйича қонунчиликда белгиланган тартибда зарур рухсатнома ва ҳужжатлар олинмаган. Вазирлик мазкур воқеа юзасидан ўзининг расмий муносабатини ҳам эълон қилди. Унга кўра, тураржой объекти қурилишида Вазирлар Маҳкамасининг 2022 йил 20 апрелдаги 200-сонли қарори талабларига кўра:

• қурилишга рухсатнома олинмаган;
• архитектура-режалаштириш топшириғи ишлаб чиқилмаган;
• лойиҳа-смета ҳужжатлари Тошкент шаҳар Қурилиш бошқармаси билан келишилмагани аниқланган.

Шу билан бирга, объектда фақат кадастр ҳужжатлари мавжудлиги, қурилиш ва монтаж ишларини амалга ошириш учун эса зарурий ҳужжатлар йўқлиги аниқланган. Натижада, «Strong Cities» компаниясига белгиланган тартибда огоҳлантириш хати юборилиб, қурилиш ва монтаж ишлари тўхтатилган. Муносабатда айтилишида, қурувчи ташкилот вакиллари лойиҳа-смета ва бошқа тегишли техник ҳужжатларни қайта кўриб чиқиб, тўлиқ расмийлаштирилган ҳолда қурилиш ишларини давом эттирилишини таъкидлаган. Шу ўринда эслатма: фуқаролардан уй-жой харид қилишда объектнинг барча ҳуқуқий ҳужжатлари ва рухсатномалари мавжудлигини синчиклаб текшириш тавсия этилади.