Зеленский Андрий Ермакни лавозимидан озод этди
У 2020 йил февралидан бери Украина президенти девонини бошқариб келаётган эди. ОАВ Ермакни президентдан кейин мамлакатдаги иккинчи энг таъсирли шахс деб атаган.
Украина президенти Володимир Зеленский ўз девони раҳбари Андрий Ермакни лавозимидан озод этиш тўғрисидаги фармонни имзолади. Ҳужжат Украина президентининг расмий веб-сайтида эълон қилинди.
Воладимир Зеленский кечки мурожаатида Андрий Ермак истеъфога чиқиш тўғрисида ариза ёзганини маълум қилганди.
«Мен Андрейга миннатдорчилик билдираман, чунки музокаралар жараёнида у Украина позициясини доимо тўғри тарзда ифодалаб келди. Бу ҳар доим ватанпарварлик нуқтаи назари эди. Аммо мен миш-мишлар ва турли тахминлар бўлмаслигини хоҳлайман. Офиснинг янги раҳбари масаласига келсак, эртага бу муассасага раҳбарлик қилиши мумкин бўлган шахслар билан маслаҳатлашувлар ўтказаман», - деди Украина президенти Ермакнинг истеъфосига изоҳ бераркан.
Унинг таъкидлашича, Россия Украинанинг хато қилишини жуда хоҳлайди.
«Биз томондан хато бўлмайди. Ишларимиз давом этмоқда. Курашимиз давом этмоқда. Ишни охиригача етказмасликка, орқага чекинишга ёки жанжаллашиб ўтиришга ҳақимиз йўқ. Бирликни йўқотсак — ҳамма нарсани йўқотиш хавфи бор: ўзимизни, Украинани, келажагимизни», - деб қўшимча қилди Зеленский.
Андрий Ермак 2020 йил февралидан бери Украина президенти девонини бошқариб келаётган эди. У Зеленскийнинг асосий ҳамкорларидан бири ҳисобланиб, ОАВ уни президентдан кейин мамлакатдаги иккинчи энг таъсирли шахс деб атаган.
«Энергоатом»даги ўғирликлар билан боғлиқ коррупция можароси бошланганидан сўнг, кўпчилик — ҳам мухолифлар, ҳам Зеленскийнинг сафдошлари президентни Ермакни ишдан бўшатишга ундади. 20 ноябр куни Украина президенти ўзининг «Халқ хизматкори» партияси аъзолари билан учрашувда бундай қилмаслигини маълум қилган эди.
28 ноябр куни эрталаб Ермакнинг уйида «Энергоатом»даги ўғирликлар бўйича коррупцияга қарши тергов доирасида тинтув ўтказилди. У тергов билан ҳамкорлик қилишини билдирди. Натижада Ермакка ҳеч қандай айблов қўйилмади.
