Зеленский Путинга Қозоғистонда учрашишни таклиф қилди
24.09.2025 | 18:3030373
Шу билан бирга Украина президенти Туркия, Саудия Арабистони, Қатар ва Европа мамлакатларини ҳам муҳокама майдонлари сифатида таклиф этган.
Украина президенти Володимир Зеленский FoxNews телеканалига берган интервюсида Владимир Путин билан учрашув масаласига тўхталиб, Қозоғистонни ҳам эҳтимолий вариант сифатида тилга олди. Унинг айтишича, Киев можарони дипломатик йўл билан ҳал қилиш мақсадида бир қатор давлатларни учрашув майдони сифатида таклиф қилган.
Зеленский Туркия, Саудия Арабистони, Қатар, шунингдек, Австрия ва Швейцария каби нейтрал Европа давлатлари номини санаган.
«Агар хоҳласангиз, масалан, Қозоғистонда», деган Украина раҳбари.Маълумот учун, Путин Украина президентини Москвада учрашувга чақирган эди. Украина буни ҳақоратли ва мантиқан мумкин эмас деб ҳисоблаб, учрашув ўтказиш таклифни рад этганди. Украина раҳбари ҳужум қилган мамлакат пойтахтига бормаслигини билдириб, учрашув учун Киевни таклиф этган. Эслатиб ўтамиз, 23 сентябр куни Қозоғистон президенти Қосим-Жомарт Тоқаев БМТ Бош Ассамблеяси доирасида Зеленский билан учрашиб, Украинадаги можарони дипломатик усулда ҳал қилиш тарафдори эканини таъкидлаган. Суҳбат чоғида икки томон савдо-иқтисодий муносабатлар ва қозоғистонлик бизнеснинг Украина тикланишига қизиқиши ҳақида ҳам фикр алмашган. Зеленский Қозоғистонга Украина суверенитети ва ҳудудий яхлитлигини қўллаб-қувватлагани учун миннатдорчилик билдирди.
