Зеленский ва Макрон «тарихий битим»ни имзолади
Франция Украинага 100 та Rafale қирувчи самолётини етказиб беради. Макрон 2027 йилгача Украинада тинчликка эришилишига умид қилмоқда.
Украина президенти Воладимир Зеленский Францияга ташриф буюриб, Эмманюэл Макрон билан учрашди. Улар Париж яқинидаги Виллакубле авиабазасининг учиш-қўниш йўлагидаёқ мудофаа соҳасидаги ниятлар декларациясини имзолади. Кеча Зеленскийнинг ўзи бу келишувни «тарихий» деб таърифлаган эди.
2035 йилгача мўлжалланган келишувнинг асосий банди 100 та Rafale қирувчи самолётини етказиб беришдир. Ушбу етказиб беришларни қандай ва ким молиялаштириши ҳозирча номаълум. Reuters манбаларга таяниб хабар беришича, айрим самолётлар Франциянинг мавжуд захираларидан бевосита топширилиши мумкин.
Зеленский ижтимоий тармоқларда маълум қилишича, Rafale’дан ташқари, томонлар Франция ва Италия томонидан биргаликда ишлаб чиқарилаётган САМП/Т ҳаво мудофаа тизимлари, улар учун радарлар, шунингдек «ҳаво-ҳаво» тоифасидаги ракеталарни етказиб беришга келишиб олди. Шунингдек, Зеленскийнинг айтишича, Украина ва Франция шу йилнинг ўзидаёқ биргаликда тутқич дронларини ишлаб чиқаришни бошлайдилар.
Келишув имзолангач, Зеленский ва Макрон «ният билдирувчилар коалицияси» штаб-квартирасига ташриф буюрди. Бу иттифоқ баҳорда Франция ва Буюк Британия ташаббуси билан тузилган бўлиб, АҚШ урушдан тобора узоқлашаётган ва Европа Иттифоқида Киевни қўллаб-қувватлашни камайтириш тарафдорларининг мавқеи кучайиб бораётган бир шароитда Украинага узлуксиз ёрдам кўрсатишни таъминлашга қаратилган.
Макрон матбуот анжуманида Украинани Европанинг биринчи мудофаа чизиғи деб атади ва Европа давлатларининг Украина армиясига ёрдами барча учун хавфсизликни таъминлашини таъкидлади.
Париждан сўнг Зеленский Мадридга йўл олади. Унинг Испанияга ташрифи тафсилотлари ҳозирча ошкор қилинмаяпти. Бу Россиянинг Украина билан катта уруши бошланганидан бери иккинчи ташриф бўлади.
Бир ой олдин Зеленский Украинага Швециянинг 100 дан 150 тагача Gripen қирувчи самолётларини етказиб беришни назарда тутувчи ният декларациясини имзолаган эди. Етказиб бериш бир неча йилга мўлжалланган. Зеленский биринчи самолётлар 2026 йилдаёқ Украинага етиб келишига умид билдирмоқда. Етказиб бериш учун ким тўлаши ҳозирча номаълум, Швеция расмийлари бунинг музлатилган Россия активларидан фойдаланиш орқали амалга оширилиши мумкинлигини истисно этмадилар.
Reuters манбаларининг таъкидлашича, Rafale ва Gripen етказиб бериш бўйича келишувлар Киевнинг ҳарбий самолётлар паркини 250 тага етказиш бўйича узоқ муддатли стратегияси доирасида тузилган. Ҳозирда тахминий ҳисоб-китобларга кўра, Украина атиги бир неча ўнлаб жанговар самолётларга эга.
