Ўзбекистонда Apple Pay ва Google Pay ишлай бошлади
Ҳозирда Google Wallet тизими тўққизта, Apple Wallet эса саккизта банк томонидан чиқарилган айрим Visa ва Mastercard карталари билан ишламоқда.
© mohid.netЎзбекистонда 27-октябрдан эътиборан Google Pay ва Apple Pay тўлов хизматларидан фойдаланиш йўлга қўйилди.
Андроид фойдаланувчилари Google Wallet, iPhone эгалари эса Apple Wallet иловалари орқали банк карталарини тизимга қўшиб, контактсиз тўловларни амалга оширишлари мумкин.
Карталарни икки усулда: банкнинг мобил иловаси орқали ёки тўғридан-тўғри Google Wallet ва Apple Wallet иловаларига карта маълумотларини киритиш йўли билан қўшиш мумкин.
Apple Wallet тизимини қўллаб-қувватлаётган банклар:
Оcтобанк — Visa ва Mastercard.
Узум — Visa;
Ориент Финанс Банк — Visa ва Mastercard;
Миллий банк — Visa ва Mastercard;
Капиталбанк —Visa ва Mastercard;
Ҳамкорбанк — Visa;
Ипак Йўли Банки — Visa ва Mastercard;
ТБC Банк — Visa ва Mastercard.
Google Wallet тизими эса 9 та банк — Оcтобанк, АВО Банк, Узум Банк, ТБC Банк, Алоқабанк, Капиталбанк, Ипак Йўли банки, Миллий банк ҳамда Ориэнт Финанс Банк томонидан чиқарилган Visa ва Mastercard карталарини қўллаб-қувватламоқда.
Apple компанияси баъзи банклар барча турдаги карталарни қўллаб-қувватламаслиги мумкинлигини ва буни банкдан аниқлаштириш зарурлигини таъкидлаган.
Шунингдек, рўйхат янги банклар қўшилиши билан янгилаб борилиши билдирилган.
Apple Wallet иловасига АТТО транспорт картасини қўшишга уриниш вақтида ҳам Ўзбекистонда чиқарилган банк карталарини улаш мумкинлиги ҳақида билдиришнома пайдо бўлмоқда.
Эслатиб ўтамиз, Google Pay ишга тушгани 19-октябрда Самарқандда Марказий Осиё ва АҚШ давлатларининг C5+1 форматидаги учрашуви доирасида Google Cloud вакили Марчин Красуски томонидан маълум қилинганди.
