Қозоғистонда пулли йўллардан тушган миллиардлаб маблағлар қаерга сарфланаётгани маълум бўлди
Қозоғистонда пулли йўллар ўз харажатларини ўзи қоплай бошлади. Даромад бирданига 86 млрд тангага чиқиб кетди. Хўш, бу пуллар кимнинг чўнтагидан чиқмоқда ва нимага сарфланади?
© gov.kzҚозоғистон Транспорт вазирлиги пуллик автомобил йўлларининг ишлаш якунларини сарҳисоб қилди. Натижалар шуни кўрсатмоқдаки, ушбу тизим тўлиқ ўзини ўзи қоплаш даражасига чиққан. Энди йўлларни барча солиқ тўловчилар эмас, фақат ундан фойдаланаётган ҳайдовчиларнинг ўзлари молиялаштирмоқда.
Даромадларнинг ўсиш суръатлари ҳайратланарли даражада юқори. Агар 2023-йилда ғазнага 32 млрд танга тушган бўлса, 2025-йил якунларига кўра бу кўрсаткич қарийб уч баробар ошиб, 86 млрд тангага етди.
Йил давомида пулли трассаларда автомобиллар ҳаракати ҳам сезиларли даражада ошган бўлиб, жами 70 млндан ортиқ қатновлар қайд этилган. Бу эса тизимнинг нақадар кенг кўламли ишлаётганини кўрсатади.
Йиғилган барча маблағлар фақатгина йўлларни сақлаш, инфратузилмани янгилаш ва техникалар харид қилишга йўналтирилган. Жумладан, 600 га яқин янги махсус техникалар сотиб олинган, 61 минг квадрат метрдан ортиқ чуқурлар ямалиб, 4 мингта янги йўл белгилари ўрнатилган.
Ҳайдовчилар учун шароитлар
Транспорт вазирлиги ҳайдовчиларни қўллаб-қувватлаш мақсадида бир қатор янгиликларни жорий қилди. Энг муҳими — агар пулли участкада йўл сифати ёмонлашса ёки нуқсонлар аниқланса, пул ундириш вақтинчалик тўхтатилади.
Шунингдек, йўл яқинида яшовчи маҳаллий аҳоли учун имтиёзли ойлик ва йиллик абонементлар тизими жорий этилган. Олдиндан тўлов қилиш орқали катта чегирмаларга эга бўлиш мумкин ҳамда юзага келган қарздорликни узиш муддати тўлиқ бир ойгача узайтирилган.
Бу имтиёзлар ҳайдовчиларнинг ортиқча харажатларини камайтиришга ва тизимга бўлган ишончни янада мустаҳкамлашга хизмат қилмоқда.
Янги йўллар қурилиши
Ҳозирги кунда Қозоғистонда узунлиги қарийб 5 минг км.ни ташкил этувчи жами 26 та пулли йўл участкалари ишлаб турибди. Қизиғи шундаки, мамлакатдаги тарифлар дунёдаги энг арзон кўрсаткичлардан бири саналади.
Бюджет маблағлари эндиликда бу трассаларни сақлаш учун сарфланмаяпти. Пуллик йўллар ўзларини тўлиқ молиявий таъминлаш даражасига чиққан.
Жорий йилнинг мартигача ҳайдовчилар бу йўллардан 11,5 млн марта ўтишга улгурди. Бундан ташқари, 2026-йил охирига қадар бутун мамлакат бўйлаб яна 11 минг км.лик янги трассалар қурилиши режалаштирилган.
