Трамп кузда Ким Чен Ин билан учрашишни режалаштирмоқда — ОАВ

АҚШ президенти Доналд Трамп жорий йилнинг кузида Хитойнинг Шэнчжэн шаҳрида Шимолий Корея етакчиси Ким Чен Ин билан учрашишни режалаштирмоқда. Бу ҳақда Америка расмийларига таяниб, «The Wall Street Journal» маълум қилди.

Манбаларга кўра, мазкур учрашув ноябр ойида Осиё-Тинч океани иқтисодий ҳамкорлиги (ОТОИҲ) саммити доирасида бўлиб ўтиши кутилмоқда. Ҳозирча саммитга расмий тайёргарлик бошланмаган.

Оқ уй вакилларининг билдиришича, икки давлат раҳбарларининг музокаралари «бунинг учун мос вақт келганда» бўлиб ўтади.

Расмийларнинг фикрича, Трамп ушбу учрашув орқали Пхеняннинг ядровий дастури бўйича музокараларни қайта тиклашни мақсад қилган.

Ядровий музокаралар ва аввалги алоқалар

Доналд Трамп ўзининг биринчи президентлик муддати давомида КХДР етакчиси билан уч марта шахсан учрашган. Бироқ ўша вақтда Шимолий Кореянинг ядровий инфратузилмасини демонтаж қилиш бўйича олиб борилган музокаралар боши берк кўчага кириб қолган эди.

Стэнфорд университети Хавфсизлик ва халқаро ҳамкорлик марказининг Пхенян ядровий дастури бўйича эксперти Жеффри Люиснинг таъкидлашича, ўтган давр мобайнида Шимолий Кореянинг ядровий арсенали сезиларли даражада ўсган.

«Намойиш этилган юзлаб учириш қурилмалари ҳамда ҳар йили ишлаб чиқарилаётган плутоний ва юқори бойитилган уран ҳажмига қараб айтадиган бўлсак, Шимолий Корея арсенали ҳозирда бир неча юзтани ташкил этиши эҳтимолга яқин», — дея унинг сўзларидан иқтибос келтирди нашр.

Бундан аввалроқ эса АҚШ президенти КХДР раҳбари унинг икки томонлама музокаралар ўтказиш ҳақидаги таклифига ижобий жавоб қайтарганини маълум қилганди.

Шунингдек, Трамп ижтимоий тармоқларда Ким Чен Ин билан тушган қўшма суратини жойлаб, у билан яхши муносабатда эканини урғулаган. Бундан ташқари, «Interfax» нашрининг хабар беришича, давлат раҳбари Шимолий Корея етакчиси билан ўрнатилган ана шундай «яхши муносабатлар» сабабли, Пентагонга АҚШ ва Жанубий Кореянинг қўшма ҳарбий машғулотлари кўламини қисқартириш бўйича ҳам топшириқ берган.