Юлдуз Усмонова: «Агар сиз, яҳудийлар, сионистлар, мени узр сўрайди деб ўйлаётган бўлсангиз, қаттиқ адашасиз»
Хонанда Ню-Йоркдаги концерти бекор бўлгач, «Инстаграм» орқали чиқиш қилиб, ўз позициясида собит эканини билдирди.
Бруклиндаги «Oceana» театри маъмурияти АҚШнинг Ню-Йорк шаҳрида режалаштирилган хонанда Юлдуз Усмонованинг концерти бекор қилинганини эълон қилди.
Бу қарор Республикачилар партиясидан Ню-Йорк штати губернаторлигига номзод Брюс Блейкман иштирокидаги норозилик намойишлари фонида қабул қилинди.
Шундан сўнг Усмонова «Инстаграм» саҳифасида видео эълон қилиб, унда Фаластинни қўллаб-қувватлашини билдирди ва узр сўраш нияти йўқлигини айтди.
Хонанданинг баёноти
«Агар сиз, яҳудийлар, сионистлар, мени узр сўрайди деб ўйлаётган бўлсангиз, қаттиқ адашасиз. <...> Мен зўравонликка қаршиман. Бу — биринчидан. Иккинчидан, Фаластин доимо озод бўлсин, бу уларнинг ери. Тушуняпсизми? Мен ҳар доим қайтараман: балки сиз қадимий халқдирсиз, лекин Исроил — янги давлат. Америка Исроил эмас, тушуняпсизми? Шунинг учун ўзингизни хўжайин деб ҳисобламанг», — деди у.
Сиёсий босим ва норозилик
Аввалроқ, хонанданинг концертига маҳаллий сиёсатчилар, жумладан, Нассау округи раҳбари ва штат губернаторлигига номзод Брюс Блейкман, шунингдек, Ню-Йорк штати Ассамблеяси аъзолари Майкл Новахов ва Алек Брук-Красний қарши чиққан эди.
Улар Усмоновани антисемитик баёнотларда айблаган. Сиёсатчиларнинг сўзларига кўра, хонандага ушбу гапларини оммавий равишда инкор этиш ва узр сўраш таклиф қилинган, бироқ у буни рад этган.
