«Infinbank»нинг асосий акциядори Фарҳод Мамажонов Perfectum'нинг 50 фоиз улушини сотиб олади

Рақобат қўмитаси тадбиркор Фарҳод Маматджановнинг «Rubicon Wireless Communication» МЧЖ устав капиталидаги 50 фоиз улушни сотиб олиши бўйича иқтисодий концентрация битимини кўриб чиқди.

Компания «Perfectum» савдо белгиси остида мобил алоқа хизматларини кўрсатади.

Қўмита Махсус комиссияси томонидан ўтказилган таҳлил натижаларига кўра, битим товар бозоридаги рақобат муҳитига салбий таъсир кўрсатмаслиги аниқланган.

Шу асосда ариза қаноатлантирилиб, «Rubicon Wireless Communication» МЧЖнинг 50 фоиз улушини сотиб олиш бўйича иқтисодий концентрация битимига розилик бериш ҳақида қарор қабул қилинди.

Фарҳод Мамажонов ким?

Фарҳод Мамажонов Ўзбекистондаги йирик тадбиркорлардан бири ҳисобланади. У «Infinbank»нинг асосий акциядори бўлиб, банкнинг 44,67 фоиз улушига эгалик қилади. Банкнинг қолган акциялари «Prestij Riyelt» МЧЖ (25,2 фоиз), Тадбиркорликни ривожлантириш компанияси (20,83 фоиз), «Azia Trans Terminal» МЧЖ (6,45 фоиз) ва Парвиз Абдусаматовга (2,85 фоиз) тегишли.

Тадбиркорликни ривожлантириш компанияси тўлиқ давлатга тегишли бўлиб, 2025 йилда «Infinbank»нинг 15 фоизини сотиб олганди. Кейинчалик компания банкдаги улушини 19 фоиздан кўпроққа оширди. Декабр ойига келиб эса компаниянинг банкдаги улуши 23 фоизга етди.

Бундан ташқари, у «Uztex Tashkent» тўқимачилик корхонаси, «Azia Trans Terminal» логистика компанияси, «Rakat Plaza» бизнес маркази, «Sofa Marva Tour» туризм компанияси ҳамда «Terassa» МЧЖда ҳам улушга эга.

2026 йилнинг 7 май куни у «Safo Airlines» номли янги авиакомпанияни ҳам ташкил этган. Устав капитали — 2,5 млрд сўм. Янги авиакомпаниянинг 60 фоиз улуши Фарҳод Мамажоновга, 30 фоизи Михаҳл Аленкинга, 10 фоизи Авазжон Ташпўлатовга тегишли.

Рақобат қўмитаси розилигидан сўнг у Perfectum мобил алоқа операторига эгалик қилувчи «Rubicon Wireless Communication» МЧЖнинг 50 фоиз улушини сотиб олиши мумкин бўлади.