IT-kompaniyalar to‘laydigan soliq miqdori, Karimov haykali poyiga qo‘yilgan gulchambar va Tojikistondan sotib olingan elektr — 30-yanvar dayjesti

O‘zbekiston Tojikistondan qancha elektr energiyasi sotib olgani ma’lum bo‘ldi

2025 yil yakunlariga ko‘ra, Tojikiston O‘zbekistonga 894,7 million kVt/soat elektr energiyasi yetkazib berdi va eksport geografiyasida Afg‘onistondan keyin ikkinchi o‘rinni egalladi. Ushbu yetkazib berilgan energiyaning umumiy qiymati 18,19 million AQSH dollariga baholanmoqda. Tojikistonning jami eksport hajmi esa 2024 yilga nisbatan 37 foizga o‘sib, 5,36 milliard kVt/soatni tashkil etgan. Ta’kidlanishicha, eksportning asosiy qismi suv zaxiralari mo‘l bo‘lgan aprel–sentabr oylariga to‘g‘ri kelgan.

Shu bilan birga, 2025 yilda Tojikistonning elektr energiyasi importi ham 67 foizga oshib, 2,7 milliard kVt/soatga yetgan va bu importning asosiy qismi O‘zbekiston hissasiga to‘g‘ri kelgan. Bu jarayon Markaziy Osiyo yagona energetika tizimi doirasida ikki davlatning bir-birini mavsumiy qo‘llab-quvvatlashini ko‘rsatadi. Tojikiston uchun elektr eksporti muhim valuta manbaiga aylanib, yil davomida umumiy eksportdan qariyb 100 million dollar daromad olgan.

«Yil futbolchisi —Eldor Shomurodov» — O‘FA yil laureatlarini aniqladi

30-yanvar kuni Toshkentda O‘zbekiston futbol assotsiatsiyasining taqdirlash marosimi bo‘lib o‘tdi. Milliy terma jamoaning ilk bor Jahon chempionati yo‘llanmasini qo‘lga kiritishi yilning eng asosiy voqeasi sifatida e’tirof etildi. Yevropa maydonlaridagi barqaror o‘yini va terma jamoadagi yetakchiligi uchun Eldor Shomurodov yilning eng yaxshi futbolchisi, tarixiy yo‘llanmani ta’minlagan murabbiylardan biri Temur Kapadze esa yil murabbiyi deb topildi. Shuningdek, Bahodir Qurbonov O‘FA prezidenti lavozimiga qayta saylandi.

Marosimda ayollar futboli, hakamlik va yoshlar futbolidagi yutuqlar ham alohida qayd etildi. Xususan, Diyora Habibullayeva yilning eng yaxshi ayol futbolchisi, Ilgiz Tantashev esa eng yaxshi hakam deb e’tirof etildi. Tarixiy natija sifatida Nasibabonu Toshmuhammedova erkaklar Superligasida bosh hakamlik qilgan ilk ayol sifatida taqdirlandi.

Shavkat Mirziyoyev Islom Karimov haykali poyiga gulchambar qo‘ydi

Shavkat Mirziyoyev Birinchi Prezident xotirasiga ehtirom ko‘rsatdi 30-yanvar kuni O‘zbekiston Respublikasi Prezidenti Shavkat Mirziyoyev Islom Karimov tavallud topgan kun munosabati bilan Toshkent shahridagi haykal poyiga gulchambar qo‘ydi. Marosim davomida Qur’on tilovat qilinib, mustaqil davlatchilik asoslarini barpo etishda Birinchi Prezidentning ko‘rsatgan beqiyos xizmatlari va insoniy fazilatlari yodga olindi. Islom Karimov nomidagi yodgorlik majmuasida o‘tgan tadbirda davlat va jamoatchilik arboblari, ilm-fan va madaniyat namoyandalari ishtirok etdi.

Birinchi Prezident xotirasini yod etish marosimlari nafaqat poytaxtda, balki uning faoliyati bilan bog‘liq Samarqand va Qarshi shaharlarida ham bo‘lib o‘tdi. U yerdagi Islom Karimov haykallari poyiga ham gullar qo‘yilib, ehtirom ko‘rsatildi. Shavkat Mirziyoyev tashabbusi bilan Islom Karimov xotirasini abadiylashtirish maqsadida Samarqandda mahobatli maqbara barpo etilgani va har yili 30-yanvar sanasini keng nishonlash ezgu an’anaga aylangani alohida ta’kidlandi.

Apple, Meta va Google — O‘zbekistonda IT-kompaniyalar qancha soliq to‘ladi?

Xorijiy IT-korporatsiyalar soliqlari 50 foizga oshdi 2025 yil yakunlariga ko‘ra, O‘zbekistonda ro‘yxatdan o‘tgan 78 ta xorijiy IT-kompaniya davlat budjetiga jami 181,3 mlrd so‘m soliq to‘lagan. Bu 2024 yilga nisbatan 1,5 baravar ko‘p demakdir. Eng diqqatga sazovor jihati shundaki, jami tushumlarning 93 foizidan ortig‘i atigi 10 ta yirik kompaniya hissasiga to‘g‘ri kelgan. Bu raqamlar mamlakat raqamli bozorining jadal o‘sib borayotgani va global brendlarning O‘zbekiston iqtisodiyotidagi ishtiroki kengayayotganini tasdiqlaydi.

Reytingda birinchi o‘rinni Apple egallab, yil davomida 49,5 mlrd so‘m soliq to‘ladi. Undan keyingi o‘rinlarni Meta (49 mlrd so‘m) va Google (44,4 mlrd so‘m) band etdi. Shuningdek, sun’iy intellekt texnologiyalarining ommalashishi natijasida OpenAI kompaniyasining to‘lovlari ham keskin oshib, 11,7 mlrd so‘mga yetdi. Hatto faoliyati cheklangan TikTok ham 3,5 mlrd so‘mlik soliq tushumini ta’minlagan.

«Tashabbusli budjet»ning bu galgi mavsumida 1 ming 253 ta mahalla qatnashmaydi

«Tashabbusli budjet» dasturining navbatdagi bosqichida avvalgi ikki mavsumda ketma-ket g‘olib bo‘lgan 1 ming 253 ta mahallaga tanaffus berildi. Shu sababli ushbu mahallalar 2026 yilgi birinchi mavsumda mustaqil ravishda loyiha kiritish imkoniyatiga ega bo‘lmaydi. Amaldagi tartibga muvofiq, ketma-ket ikki mavsumda g‘olib bo‘lgan mahallalar uchun navbatdagi ikki mavsumda loyiha kiritish cheklovi qo‘llaniladi. Shu asosda 2026 yil 1-mavsumida ishtirok eta olmaydigan mahallalar ro‘yxati shakllantirilgan. Ro‘yxat bilan bu yerda tanishishingiz mumkin.

Shu bilan birga, ayrim hududlar uchun istisno saqlab qolingan. Xususan, 23 ta tuman va shaharda mavjud mahallalar soni 15 ta va undan kam bo‘lgani sababli, ushbu hududlardagi mahallalarga tanaffus qo‘llanmadi. Tanaffus berilgan mahallalar uchun loyiha faoliyati to‘liq cheklanmaydi. Ushbu mahallalar sherikchilik asosida, ya’ni boshqa mahallalar bilan hamkorlikda loyihalarni ilgari surish imkoniyatiga ega.