Kelajakda yulduzlardan xabar olib keladigan kosmonavt, 240 mlrd dollardan oshadigan YAIM va taqsimlangan davlat byudjeti — 26-dekabr dayjesti

Ilk bor o‘zbekistonlik kosmonavt kosmosga uchiriladi – Shavkat Mirziyoyev

O‘zbekiston prezidentining so‘zlariga ko‘ra, bugun minglab yoshlar IT va sun’iy intellekt bo‘yicha izlanish olib bormoqda. Ularning kvant, dron, robototexnika kabi yo‘nalishlardagi konstruktorlik loyihalarini amaliyotga tatbiq qilish uchun «Raqamli texnologiyalar markazi» tashkil etiladi.

«Bugun sizlarga yana bir muhim yangilikni aytmoqchiman. Mustaqil O‘zbekiston tarixida ilk bor kosmik sohada sun’iy yo‘ldosh va mamlakatimiz fuqarosi bo‘lgan birinchi o‘zbek kosmonavtini fazoga uchirish bo‘yicha ishlarni boshladik. O‘zbekiston kosmonavti bobomiz aniqlagan yulduzlardan xabar olib keladi. Bu Yangi O‘zbekistonning ilmiy va texnologik rivojlanishiga, umuman, milliy taraqqiyotimizni yangi bosqichga olib chiqishga katta turtki beradi deb ishonaman», — dedi prezident.

Ichki ishlar vaziri va Milliy gvardiya qo‘mondoni metroda ko‘rinish berdi

Toshkent shahar Ichki ishlar bosh boshqarmasi boshlig‘i, general-mayor Aziz Toshpo‘latov va Milliy gvardiya qo‘mondoni, general-mayor Rustam Jurayev Toshkent metrosi vagonida ko‘rinish berdi.

Suratda rahbarlarning fuqarolik kiyimida ekani tasvirlangan. Ularning nima maqsadda metroga tushgani aniq emas: ishdan uyiga jamoat transportida ketishni afzal bilganidanmi yoki jamoat tartibini saqlash bo‘yicha mas’ul xodimlarning ishini nazorat qilish uchun?

O‘zbekistonliklar eng ko‘p qaysi davlatlarga sayohat qilmoqda?

2025 yilning 11 oyi davomida qariyb 7 million nafar O‘zbekiston fuqarosi turistik maqsadlarda xorijga chiqqan bo‘lib, bu ko‘rsatkich o‘tgan yilga nisbatan 23 foizga oshgan. Eng ko‘p safarlar qo‘shni davlatlar hissasiga to‘g‘ri kelmoqda: Qirg‘iziston 3,1 million nafar ko‘rsatkich bilan ro‘yxatda yaqqol yetakchilik qilmoqda. Shuningdek, Qozog‘iston (1,3 mln) va Tojikiston (1,2 mln) kuchli uchlikdan joy olgan bo‘lib, bu chegaraoldi harakatlari va qarindoshlik aloqalari faolligidan dalolat beradi.

Uzoq xorij davlatlari orasida Rossiya (399 ming) va Saudiya Arabistoni (296,4 ming) eng ommabop yo‘nalishlar bo‘lib qolmoqda. Saudiya Arabistoniga tashriflar sonining yuqoriligi asosan ziyorat turizmi bilan izohlansa, Turkiya, BAA va Misr kabi davlatlar hordiq chiqarish uchun asosiy tanlovlar sifatida qayd etilgan. Shuningdek, TOP-10 ro‘yxatidan Xitoy va Vietnam kabi yangi yo‘nalishlar ham joy olgan bo‘lib, bu aviaqatnovlar geografiyasi kengayayotganini tasdiqlaydi.

2026 yilda uy-joy ipotekasiga 23 trln so‘m ajratiladi

Prezident Shavkat Mirziyoyevning Oliy Majlis va O‘zbekiston xalqiga yo‘llagan Murojaatnomasida 2026 yilda uy-joy ipotekasi uchun 23 trillion so‘m resurs ajratilishi ma’lum qilindi. Aholining moliyaviy yukini yengillashtirish maqsadida boshlang‘ich to‘lov va foizlarni qoplash uchun 2,7 trillion so‘m subsidiya beriladi. Shuningdek, bitta kvartira uchun ajratiladigan imtiyozli ipoteka kreditining eng yuqori miqdori 15 foizga oshirilib, kelgusi yilda jami 140 mingta xonadondan iborat ko‘p qavatli uylar qurilishi rejalashtirilgan.

Shu bilan birga, qurilish va uy-joy bozoridagi faollikni qo‘llab-quvvatlash uchun iste’mol kreditlari hajmi 125 trillion so‘mga yetkaziladi. Bu choralar qurilish materiallari va maishiy texnika bozorida talabni oshirib, sohadagi ishlar hajmini 30 milliard dollarga yetkazishga xizmat qiladi. 2026 yilda qurilish ishlari hajmini 11 foizga oshirish iqtisodiy islohotlarning bosh maqsadlaridan biri sifatida belgilab olindi.

O‘zbekiston YAIM hajmi 2030 yilgacha 240 mlrd dollardan oshiriladi – Shavkat Mirziyoyev

Prezident Shavkat Mirziyoyev Oliy Majlis va xalqqa yo‘llagan Murojaatnomasida O‘zbekiston iqtisodiyoti tarixda ilk bor 145 milliard dollarlik marrani zabt etganini e’lon qildi. Davlat rahbarining ta’kidlashicha, iqtisodiy o‘sish sur’atlari shu tarzda davom etsa, avvalroq «O‘zbekiston – 2030» strategiyasida belgilangan 160 milliard dollarlik ko‘rsatkichga 2026 yilning o‘zidayoq erishiladi. Kelgusi besh yillikda esa mamlakat YAIM hajmini 240 milliard dollardan oshirish asosiy strategik maqsad etib belgilandi.

Ushbu yuqori marralarga erishish uchun yuqori qo‘shilgan qiymat yaratadigan tarmoqlar, bioinjeneriya, «yashil» energetika va ilg‘or agrotexnologiyalarni rivojlantirishga asosiy urg‘u beriladi. Prezident iqtisodiyotni yangi sifat bosqichiga olib chiqishda zamonaviy texnologiyalar va malakali kadrlar hal qiluvchi ahamiyatga ega ekanini alohida qayd etdi. Ilm-fan va innovatsiyalarga asoslangan bunday yondashuv O‘zbekistonning global iqtisodiy raqobatbardoshligini ta’minlashda muhim poydevor bo‘ladi.

2026 yil uchun Davlat byudjeti tasdiqlandi

Prezident Shavkat Mirziyoyev «2026 yil uchun O‘zbekiston Respublikasining Davlat byudjeti to‘g‘risida»gi qonunni imzoladi. Unga ko‘ra, kelgusi yil uchun konsolidatsiyalashgan budjet taqchilligining cheklangan miqdori yalpi ichki mahsulotning 3 foizi darajasida belgilandi. Qonun bilan budjet mablag‘larini taqsimlovchilar uchun qat’iy intizom o‘rnatilib, ajratilgan mablag‘larni keyingi moliya yiliga o‘tkazish taqiqlandi; bu chora mablag‘larning yil davomida maqsadli va to‘liq ishlatilishini ta’minlashga qaratilgan.

Shuningdek, hujjatda ijara to‘lovlarining eng kam stavkalari, chakana savdo yig‘imlari va xorijiy avtotransport vositalarining tranziti uchun to‘lov miqdorlari mustahkamlandi. Mazkur budjet parametrlari 2026 yil 1-yanvardan kuchga kiradi va davlat moliyaviy barqarorligini saqlashda asosiy huquqiy asos bo‘lib xizmat qiladi. Yangi budjet siyosati doirasida xarajatlar ustidan nazorat tizimini yanada kuchaytirish va davlat daromadlari bazasini kengaytirish ustuvor vazifa etib belgilangan.