UzАuto Motors 2025 йилда 1,8 трлн сўмдан ортиқ солиқ тўлади
Ўзбекистондаги ишлаб чиқариш корхоналари томонидан тўланган солиқлар ва уларга берилган солиқ имтиёзлари миқдори маълум қилинди.
2025 йилнинг январ–ноябр ойларида ишлаб чиқариш фаолияти билан шуғулланувчи 60 631 та юридик шахс томонидан 85,3 трлн сўмдан ортиқ солиқ тўланган. Бу ҳақда Солиқ қўмитаси маълум қилди.
Қайд этилишича, бу даврда ишлаб чиқариш корхоналарининг товар айланмаси 824,2 трлн сўмни ташкил этган. Шунингдек, уларга 41,02 трлн сўмлик солиқ имтиёзлари берилган.
Умумий солиқ тушумларининг 17,7 трлн сўми 20 та солиқ тўловчи ҳисобига тўғри келади. Уларнинг товар айланмаси 199,9 трлн сўм, фойдаланган солиқ имтиёзлари миқдори эса 2,6 трлн сўмдан ошган.
Жумладан, январ–сентябр ойларида «O‘zbekneftgaz» компанияси энг кўп – 3,4 трлн сўм солиқ тўлаган. Шу билан бирга, «Uzbat AO» 2,6 трлн сўм, «UzАuto Motors» 1,8 трлн сўм, «Талимаржон иссиқлик электр станцияси» 1,3 трлн сўм солиқ тўлагани қайд этилди.
Аввалроқ 2025 йилда Ўзбекистон автомобил бозорида умумий сотув ўсган бўлса-да, UzAuto Motors’да пасайиш кузатилгани, шунингдек, хорижий брендлар сотуви ортгани ҳақида хабар бергандик.
Эслатиб ўтамиз, Vaqt.uz 2026 йилда Ўзбекистонда солиқ ставкаларида қандай ўзгаришлар бўлгани ҳақида таҳлилий материал эълон қилганди.
