Amazon Ню Йоркда 700 нафарга яқин ходимни ишдан бўшатмоқда

Ню Йорк штати Меҳнат департаментига бериладиган расмий маълумотларга кўра, Манҳеттенда жойлашган тўққизта офисда жами 660 нафар ходим ишидан айрилади. Энг кўп қисқартириш Amazon’нинг Manhattan West офиси ва Fifth Avenue’dа жойлашган собиқ Lord&Taylor биносидаги New York Tech Hub’да амалга оширилади.

Ишдан бўшатишлар 28 октябрда бошланган ва барча ходимларга бу ҳақда маълум қилинган.

«Ташкилотимизда содда тузилма талаб этилади»

Amazon’нинг HR ва технологиялар бўйича катта вице-президенти Бет Галетти ходимларга йўллаган мактубида бундай қарорни қуйидагича изоҳлаган:

«Биз соддароқ, камроқ иерархик ва кўпроқ масъулиятга эга ташкилот бўлишимиз керак. Мижозларимиз учун тезроқ ҳаракат қилишга мажбурмиз», — деди у.

Amazon бош директори Энди Жесси 2021 йилда Жефф Безосдан лавозимни қабул қилганидан бери HR, булут технологиялари ва реклама каби соҳаларда кўплаб қисқартиришларга раҳбарлик қилган.

Amazon’дан компенсация ва кўмак

Компания ишдан бўшатилган ходимларга қуйидаги имкониятларни тақдим этишини маълум қилди:

• 90 кунлик олдиндан огоҳлантириш муддати,

• қонунда белгиланган компенсация тўловлари,

• тиббий харажатлар учун яккалик тўлов,

• бепул касбий ўқувлар ва янги иш топишда ёрдам.

Amazon Ню Йоркдаги тўққизта офис ёпилмаслигини, ишдан бўшатишлар фақат корпоратив лавозимларга тегишли эканини, омбор ва етказиб бериш ходимлари бу жараёндан четда эканини таъкидлади.

Технология компанияларида қисқартиришлар тенденцияси

Муттахассисларнинг таъкидлашича, бу қарор сўнгги бир йил ичида йирик технология компанияларининг умумий қисқартириш йўналишига мос келади. Корхоналар бозор шароитига мослашиш ва сунъий интеллект йўналишига кўпроқ сармоя киритиш мақсадида корпоратив штатни қисқартирмоқда.

Шу қисқартиришларга қарамасдан, Amazon Манҳеттендаги офислари ва бутун штат бўйлаб логистика марказлари орқали Ню Йоркдаги энг йирик хусусий иш берувчилардан бири бўлиб қолмоқда.