Экорейдлар авжида: 50 та қурилиш обектида ишлар тўхтатилди
Тошкентда экологик талабларга амал қилмаган 50 га яқин қурилиш объектида ишлар вақтинчалик тўхтатилди.
Тошкент шаҳар Қурилиш ва уй-жой коммунал хўжалиги соҳасида назорат қилиш инспекцияси шаҳар экологик муҳитини яхшилаш мақсадида қурилиш объектларида доимий рейдлар ўтказмоқда.
Кўплаб қурилиш компаниялари ҳудудларни намлаб туриш учун махсус техника ва сув пурковчи ускуналардан фойдаланмоқда. Бу чоралар чангнинг ҳавога кўтарилишини камайтиришга хизмат қилади. Бироқ олиб борилган текширувлар барча объектлар талабларга тўлиқ амал қилаётганини кўрсатмади.
Рейдлар натижасида 289 та расмий ёзма кўрсатма берилди. Экологик қоидаларни қўпол равишда бузган 50 га яқин қурилиш объектида ишлар вақтинчалик тўхтатилди. Инспекция бу ҳаракатларнинг мақсади қурилиш соҳасида экологик маданиятни ошириш ва аҳоли учун тоза ҳавони таъминлаш эканини маълум қилди.
Масъул идора назорат тадбирлари янада кучайтирилган тартибда давом этишини билдирди. Қурилиш ташкилотларига белгиланган экологик талабларга қатъий риоя қилиш муҳимлиги яна бир бор эслатилди.
Эслатиб ўтамиз, Тошкент шаҳрида қурилиш жараёнларида ҳаво ифлосланишига сабаб бўладиган омилларни олдини олиш ва бартараф этиш учун ҳуқуқни муҳофаза қилувчи органлар ва назорат ташкилотларидан 232 нафар ходим жалб этилган.
