Қозоғистонда пора таклиф қилишнинг ўзи ҳам жиноят деб тан олинмоқда
Энди Қозоғистонда пора олиш ва беришдан ташқари, уни ваъда қилиш ёки таклиф этишнинг ўзи ҳам жиноий жавобгарликка сабаб бўлиши мумкин.
© DepositphotosҚозоғистон парламенти коррупцияга қарши курашни кучайтиришга қаратилган янги қонунлар тўпламини маъқуллади. Янги тартибга кўра, нафақат пора олиш ва бериш, балки пора беришни ваъда қилиш, таклиф этиш ёки талаб қилишнинг ўзи ҳам жиноят сифатида баҳоланади. Бу ҳақда Tengrinews нашри хабар берди.
Таклиф қилишнинг ўзи ҳам жиноят
Муҳим янгиликлардан бири — пора бериш ниятининг ўзи жиноят сифатида баҳоланишидир. Қонунга кўра, пора таклифи ёки ваъдаси оғзаки тарзда билдирилган бўлса ҳам, ёзма хабар орқали юборилган бўлса ҳам жавобгарликка сабаб бўлиши мумкин.
Сенатор Евгений Болгерт ушбу норма амалда қандай қўлланилиши ҳақида савол кўтарди. Унинг таъкидлашича, поранинг ўзи берилмаган ҳолатда ҳам фақат оғзаки ваъда учун жиноий жавобгарликка тортиш масаласи ҳуқуқий жиҳатдан аниқлаштирилиши лозим.
Сенатор Андрей Лукин эса мазкур ўзгаришлар коррупцияга қарши ички назоратни кучайтириш ва ҳуқуқбузарликларни яшириш ҳолатларига қарши самарали механизм яратишини билдирди.
Ёзишмалар далил бўлади
Сенат спикери Маулен Ашимбаевнинг таъкидлашича, жиноий ният турли шаклларда қайд этилиши мумкин. Бунда оғзаки мурожаатлар, хабар алмашинувлари, ижтимоий тармоқлардаги ёзишмалар ва интернет орқали юборилган хабарлар исбот сифатида кўриб чиқилиши мумкин.
Унинг сўзларига кўра, судлар бундай ишлар бўйича қарор қабул қилишда мавжуд исботлаш амалиёти ва процессуал қоидаларга таянади.
