Реклама қонунини бузган блогерлар, рекорд даражада тўпланган олтин ва VEON харид қилган OLX — 9 ноябрь дайжести

Ўзбекистоннинг олтин-валюта захиралари йил бошидан бери энг паст даражага тушди

2026 йилнинг 1 ноябрь ҳолатига кўра, Ўзбекистоннинг олтин-валюта захиралари 63,62 миллиард долларни ташкил этиб, йил бошидан бери кузатилган энг паст кўрсаткичга тушди. Марказий банк маълумотларига кўра, октябрь ойида умумий захиралар қарийб 3 миллиард долларга қисқарган. Мазкур камайишга жаҳон бозорида олтин нархининг арзонлашуви асосий омил бўлиб, захирадаги олтин қиймати 2 миллиард доллардан кўпроққа, эркин конвертация қилинадиган валюта қисми эса 921 миллион долларга камайган.

Умумий қийматнинг пасайишига қарамай, мамлакат захирасидаги олтиннинг физик ҳажми ой давомида 7,33 тоннага кўпайиб, 453,5 тоннага етди ва бу Ўзбекистон тарихидаги янги рекорд кўрсаткич ҳисобланади. Шунингдек, умумий халқаро захиралар таркибида олтиннинг улуши 91 фоизга етиб, мазкур йўналишда ҳам янги максимум қайд этилди.

Beeline Қозоғистондаги OLX платформасини 81 млн долларга сотиб олди

«Beeline Kazakhstan»нинг бош компанияси ҳисобланган VEON Қозоғистондаги OLX платформасининг 100 фоиз улушини 81 миллион долларга сотиб олди. Битим 2026 йил 6 ноябрда тегишли рухсатлар олингач тўлиқ якунланган бўлиб, харид қийматига қарийб 6 миллион долларлик тузатишлар ҳам киритилган. Ойига қарийб 9 миллион киши (мамлакат интернет аудиториясининг 52 фоизи) фойдаланадиган ва йиллик тушуми 28 миллион доллардан ошадиган мазкур эълонлар платформаси эндиликда VEON'нинг рақамли хизматлар экотизимига интеграция қилинади.

Маълумот ўрнида, Қозоғистондаги мазкур битимдан аввал Ўзбекистондаги OLX платформаси ҳам «TBC Bank Group» томонидан сотиб олинган эди. Рақобат қўмитаси 2026 йилнинг июнь ойида TBC гуруҳига алоқадор «Tapuz Limited» компаниясига OLX’нинг 100 фоиз улушини харид қилишга розилик берган. Қўмита мазкур харидга фойдаланувчиларни фақат «TBC Bank» ёки «Payme» орқали тўлов қилишга мажбурламаслик ва йиғилган маълумотлардан рақобатни чеклаш мақсадида фойдаланмаслик каби қатъий шартлар асосида рухсат берган.

Реклама қонунчилигини бузган 12 блогер жазоланди

Рақобат қўмитаси ижтимоий тармоқларда фаолият юритаётган 110 нафар блогернинг саҳифаларида кунлик мониторинг ўтказиб, «Реклама тўғрисида»ги қонун талабларини бузган 12 нафар блогерга нисбатан маъмурий жазо чораларини қўллади. Қўмита таъкидлашича, реклама материалларида истеъмолчиларни чалғитувчи, товар ва хизматлар ҳақида нотўғри тасаввур уйғотувчи ёки яширин маълумотларни тарқатиш мумкин эмас.

Шунингдек, қўмита томонидан таниқли қўшиқчилар, актёр-актрисалар ва спортчиларнинг ҳам алоҳида рўйхати шакллантирилган бўлиб, эндиликда уларнинг ҳам ижтимоий тармоқлардаги реклама фаолияти мунтазам назорат қилиб борилади. Идора қонунчилик талабларини билмаслик жавобгарликдан озод этмаслигини эслатиб, ижтимоий тармоқлардаги рекламалар устидан назорат янада кучайтирилишини маълум қилди.

Яна бир ташкилотга крипто-дўкон фаолиятини амалга ошириш учун лицензия берилди

Истиқболли лойиҳалар миллий агентлиги томонидан 2026 йилнинг 9 ноябрь куни «C-STORE» МЧЖга крипто-дўкон фаолиятини амалга ошириш учун лицензия тақдим этилди. Мазкур рухсатнома берилганидан сўнг, Ўзбекистонда қонуний равишда крипто-дўкон фаолиятини юритиш ҳуқуқига эга бўлган корхоналар сони 15 тага етди. Эслатиб ўтамиз, бундан аввал 26 октябрь куни «Монетех» МЧЖга ҳам худди шундай лицензия берилган эди.

Шунингдек, бугунги кунда мамлакатда крипто-биржа фаолияти бўйича «Kobea Group» ва «Coinpay» компаниялари ҳам тегишли лицензияга эга бўлиб фаолият юритмоқда. Агентлик фуқароларга крипто-активлар билан боғлиқ операцияларни фақатгина Ўзбекистонда белгиланган тартибда лицензия олган расмий платформалар орқали амалга оширишни ҳамда уларнинг рўйхати билан «napp.uz» сайти орқали танишиб боришни тавсия қилади.

Ўзбекистон яримўтказгичлар саноатини ривожлантириш бўйича 10 йиллик стратегияга эга бўлади

Ўзбекистонда 2027–2036 йилларга мўлжалланган микроэлектроника ва яримўтказгичлар саноатини ривожлантириш бўйича миллий стратегия ишлаб чиқилмоқда. Мазкур лойиҳани амалга ошириш учун Осиё тараққиёт банки томонидан 1,2 миллион доллар (шундан 1 млн доллари стратегияга, 200 минг доллари кадрлар ва консультантларга) миқдорида техник ёрдам ажратилиши маъқулланди. Ҳужжатни тайёрлашга халқаро тендер асосида танлаб олинган мутахассислар, жумладан, 17 йил «Intel» корпорациясида фаолият юритган америкалик эксперт Гленн Куиро ҳамда маҳаллий олим, физика-математика фанлари доктори Ойбек Абдулхаев бошчилигидаги тажрибали гуруҳ жалб қилинган.

Лойиҳа доирасида соҳа учун малакали кадрлар тайёрлаш ва уларнинг салоҳиятини оширишга алоҳида эътибор қаратилмоқда. Хусусан, интеграл схемаларни лойиҳалаш бўйича саралаб олинган 50 нафар номзоднинг 20 нафари Малайзияга, яна 20 нафари эса Жанубий Корея университетларига икки ойлик малака оширишга юборилади. Шунингдек, Ҳиндистоннинг NIELIT институти билан ҳамкорликда «ToshTech» базасида 100 киши учун яримўтказгич технологиялари бўйича бепул ўқув дастури йўлга қўйилмоқда, қолаверса, 2025–2026 йиллар давомида 30 дан ортиқ давлат идораларининг 130 га яқин раҳбар ходимлари ушбу йўналишда махсус тренинг ва семинарларда ўз билимларини оширди.