Tojikistonda inflatsiya so‘nggi olti oy ichida 2,4 foizni tashkil etdi

Tojikistonda iste’mol narxlari 2026 -yilning yanvaridan iyuniga qadar 2,4 foizga oshdi. Yil boshidan beri oziq-ovqat narxlari o‘rtacha 2,6 foizga, oziq-ovqat bo‘lmagan tovarlar narxlari 1,7 foizga va pullik xizmatlar 3,8 foizga oshdi. Bu haqda «Asia-Plus» tahlilida keltirilgan.

Iyun oyining o‘zida iste’mol narxlari indeksi 99,9 foizni tashkil etdi, bu may oyiga nisbatan mamlakatdagi o‘rtacha narxlar darajasi 0,1 foizga pasayganini anglatadi. O‘tgan oyda oziq-ovqat mahsulotlari 0,3 foizga arzonlagan bo‘lsa, nooziq-ovqat mahsulotlari va pullik xizmatlar esa aksincha 0,2 foizga qimmatlagan.

Yanvardan iyungacha yoqilg‘i narxlari o‘rtacha 22,2 foizga oshdi. Suyultirilgan gaz narxi 34,8 foizga, dizel yoqilg‘isi 20,6 foizga va benzin narxi 10 foizga oshdi.

Pomidor arzonladi, ammo piyoz qimmatladi

Iyun oyida oziq-ovqat narxlarining umumiy pasayishiga qaramay, ayrim tovarlar narxi sezilarli darajada oshdi.

Tarvuz narxi eng katta o‘sishni qayd etdi, 18,8 foizga oshdi. Piyoz 13,6 foiz, sabzi 6 foiz, grechka 3,9 foiz, uzum 2,5 foiz va makaron 1,2 foizga oshdi.

Non mahsulotlari va don mahsulotlari narxlari o‘rtacha 0,8 foizga, go‘sht mahsulotlari 0,6 foizga, yog‘ 0,7 foizga oshdi. Xususan, mol go‘shti 1,1 foizga, qo‘y go‘shti 0,4 foizga va tovuq go‘shti 0,1 foizga oshdi. Paxta yog‘i 1 foizga va kungaboqar yog‘i 0,3 foizga oshdi.

Shu bilan birga, bozorlarda mavsumiy sabzavotlar va boshqa ba’zi mahsulotlar narxi pasaydi. Oy davomida pomidor 25,8 foizga, bodring 9,2 foizga, karam 8,3 foizga va olma 6,3 foizga arzonladi. Gazlangan ichimliklar 5,5 foiz, kartoshka 5,4 foiz, tuxum 4,9 foiz, banan 3,8 foiz, sut 2,2 foiz, shakar 2 foizga arzonladi.

Eslatib o‘tamiz, avvalroq Yevroosiyo taraqqiyot banki Tojikiston iqtisodiyoti 2026 yilning oxiriga borib 8,3 foizga o‘sishini prognoz qilgandi.