Уитакер: Трамп Россияга қарши янги санкциялар тайёрламоқда
АҚШнинг НАТОдаги элчиси Доналд Трамп Россияга нисбатан янги санкциялар жорий этишга тайёргарлик кўраётганини таъкидлади.
АҚШ президенти Доналд Трамп Россияга қарши янги иқтисодий санкциялар тайёрламоқда. Бу ҳақда НАТОдаги АҚШ элчиси Мэтю Уитакер Bloomberg агентлигига берган интервюсида маълум қилди. Унинг сўзларига кўра, янги чекловлар Москвага босимни кучайтириб, Владимир Путинни музокаралар столига ўтиришга мажбур этиши мумкин.
«Биз бу санкцияларни жорий қилдик ва уларга қатъий риоя қиламиз», — деди Уитакер.
Элчининг таъкидлашича, Вашингтоннинг асосий мақсади — Россияни Украинадаги урушни тугатишга ундаш ёки камида вақтинчалик сулҳ тузишга эришишдир.
Эслатиб ўтамиз, ўтган ҳафта АҚШ Молия вазирлиги Россиянинг икки йирик нефт компанияси — «Роснефт» ва «Лукойл»га нисбатан санкциялар жорий этган эди. Бу Трамп президентликка келганидан бери Россияга қарши киритилган илк йирик молиявий чеклов пакети бўлди.
Санкциялар ҳақидаги хабардан сўнг нефт нархи кескин ўсди, бироқ бозорнинг умумий реакцияси эҳтиёткор бўлди. Таҳлилчилар буни Вашингтон томонидан янги чораларни қандай даражада амалга оширилишига оид ноаниқлик билан изоҳламоқда.
«Президент Трампнинг қўлида ҳали кўп «кўзир»лар бор. Бу фақат улардан бири, холос. Қолганлари ҳам навбатда», — дея қўшимча қилди Уитакер.
Унинг сўзларига кўра, АҚШ маъмурияти Москвага нисбатан босим сиёсатини босқичма-босқич кучайтиради.
