Яқин Шарқдаги йирик порт хавф остида: танкерлар у ерга киришдан қўрқяпти

Яқин Шарқдаги йирик нефт логистика марказларидан бири саналган БААнинг Фужайра порти атрофида хавф кучаймоқда.

Портдаги вазият

«Bloomberg» агентлиги маълумотига кўра, бир қатор халқаро кемачилик компаниялари дрон ҳужумлари таҳдиди ва суғурта билан боғлиқ ноаниқликлар туфайли портга киришдан бош тортмоқда.

Фужайра порти Хўрмуз бўғози яқинида жойлашган бўлса-да, у бевосита бўғоз ҳудудига кирмайди. Шунга қарамай, минтақадаги кескинлик ва ҳарбий таҳдидлар порт фаолиятига жиддий таъсир кўрсатмоқда.

Манбаларга кўра, танкерлар портга киришдан қочаётгани учун шартнома асосида етказиб берилган нефтни олиб кетиш кечикмоқда. Шу сабабли у янада юқорироқ нархда сотилиши мумкин бўлган товарга айланмоқда.

Халқаро кемачилик компанияларининг қарори

«Bloomberg» манбалари билдиришича, Европанинг камида битта йирик юк ташувчи компанияси Фужайрага киришдан воз кечган. Япониянинг «Nippon Yusen KK» кемачилик компанияси ҳам хавфсизлик сабаб портга қатновларни вақтинча тўхтатганини элон қилган.

Трейдерлар фикрича, кемачилик компаниялари асосан дрон ва ракета ҳужумлари хавфидан чўчимоқда. Шунингдек, суғурта компанияларининг эҳтиёткор позицияси ҳам қарорларга таъсир қилмоқда. Агар юклар бекор қилинса, улар бозорда спот нархларида қайта сотилиши мумкин.

Минтақадаги бошқа терминаллар ҳолати

Фужайра минтақада нефт экспортини давом эттираётган кам сонли терминаллардан бири ҳисобланади. Шу билан бирга, Саудия Арабистонининг Қизил денгиздаги Янбу порти ва Ўмондаги Мина ал-Фаҳал терминали ҳам ҳозирча фаолиятни давом эттирмоқда.

28-феврал тонгида АҚШ ва Исроилнинг Эронга қарши операцияси бошлангач, Теҳрон Хўрмуз бўғозини ёпиб қўйди. Ислом инқилоби муҳофизлари корпуси (ИИМК) Эрон қуролли кучлари ушбу сув йўлини тўлиқ назорат қилаётганини билдирди. Натижада, жаҳон нефт етказиб бериш ҳажмининг қарийб 20 фоизи ўтадиган бўғоз орқали тижорий кемалар ҳаракати амалда тўхтаб қолди.