Toshkentda isitish mavsumi qachon boshlanishi aytildi
Shahar hokimligi ob-havo keskin sovigan taqdirda, issiqlik berishni boshlash qarori kechiktirilmasligini ma’lum qildi.
© istockToshkent shahrida markazlashgan isitish tizimini yoqish uchun o‘rtacha sutkalik havo harorati ketma-ket besh kun davomida +8 darajadan past bo‘lishi talab etiladi. Bu haqda Toshkent shahar hokimligi ma’lum qildi.
Amaldagi belgilangan tartib bo‘yicha isitish mavsumi ma’lum harorat rejimiga bog‘langan bo‘lsa-da, tizim yoqilishi uchun aniq va qat’iy muddat belgilanmagan.
Mutasaddilarning ta’kidlashicha, o‘tgan yillardagi kabi haqiqiy ob-havo sharoitlari to‘liq inobatga olinadi. Agar poytaxtda havo keskin sovib ketadigan bo‘lsa, issiqlik uzatishni boshlash to‘g‘risidagi qaror kechiktirilmaydi va jarayon tezroq boshlanishi mumkin.
Tayyorgarlik jarayoni va o‘tgan yilgi ko‘rsatkichlar
Hozirgi kunda hokimlik, tegishli shahar xizmatlari hamda «Veolia Energy Tashkent» kompaniyasi mutaxassislari hamkorligida issiqlik tizimlarini mavsumga tayyorlash ishlari nazorat ostida olib borilmoqda. Toshkent shahrida isitish mavsumi boshlanishining aniq sanasi to‘g‘risida qo‘shimcha xabar berilishi ma’lum qilingan.
Ma’lumot o‘rnida, 2025-yilda poytaxtda isitish mavsumi 3-noyabrdan boshlangan edi. Ushbu sanadan boshlab dastlab ijtimoiy obyektlarda, 5-noyabrdan boshlab esa turar joy binolarida markazlashgan issiqlik ta’minotini berish yo‘lga qo‘yilgan edi.
