Энди банклардан паспортсиз 500 долларгача нақд валюта олиш мумкин
9 августдан бошлаб Ўзбекистонда банклардан паспортсиз 500 долларгача нақд валюта олиш тартиби ишга тушди.
© dzen.ru2026 йил 9 августдан бошлаб Ўзбекистонда банклардан паспортсиз олиш мумкин бўлган нақд чет эл валютаси лимити оширилди. Янги тартибга кўра, энди 500 АҚШ долларигача бўлган нақд валютани шахсни тасдиқловчи ҳужжатни тақдим этмасдан олиш мумкин.
Аввал банклардан паспортсиз энг кўпи билан 100 АҚШ доллари миқдорида нақд чет эл валютасини олиш мумкин эди. Янги қарор билан ушбу лимит беш бараварга оширилди.
Ушбу тартибни назарда тутувчи қарор Адлия вазирлиги томонидан 2026 йил май ойида давлат рўйхатидан ўтказилган эди.
Ундан аввал, март ойида Марказий банк ҳамда Бош прокуратура ҳузуридаги Иқтисодий жиноятларга қарши курашиш департаменти қарор лойиҳасини жамоатчилик муҳокамасига қўйганди.
Муҳокама жараёнида мижозларни идентификация қилиш тартибларини такомиллаштириш ва молиявий операциялар шаффофлигини оширишга қаратилган бир қатор таклифлар ҳам илгари сурилган.
Қарорга мувофиқ, банклар мижозларни биометрик паспорт, ID карта ёки рақамли идентификация воситалари орқали текшириши лозим. Шу билан бирга, пул ўтказмалари ва бошқа молиявий операцияларга оид маълумотларни янада батафсил қайд этиш талаблари ҳам кучайтирилмоқда.
Эслатиб ўтамиз, аввалроқ Марказий банк мурожаатлар бўйича энг салбий кўрсаткичга эга 10 та банкни эълон қилганди.
