«Инфинбанк»нинг эгаси янги авиакомпания очди
7 май куни «Safo Airlines» МЧЖ давлат рўйхатидан ўтказилди. Компаниянинг асосий улуши «Инфинбанк»нинг эгаси Фарҳод Мамажоновга тегишли.
© InfinbankЎзбекистондаги хусусий банклардан бири «Инфинбанк» афилланган шахслари рўйхатига «Safo Airlines» МЧЖ компаниясини қўшди. Бу ҳақда Корпоратив ягона ахборот порталида маълум қилинди.
Safo Airlines ҳаво транспорти соҳасидаги хизматлар кўрсатиш мақсадида 7 май куни ташкил қилинди ва «Инфинбанк» билан алоқадор компания сифатида рўйхатдан ўтказилди. Устав капитали — 2,5 млрд сўм.
Янги авиакомпаниянинг 60 фоиз улуши Фарҳод Мамажоновга, 30 фоизи Михаҳл Аленкинга, 10 фоизи Авазжон Ташпўлатовга тегишли.
Манба: InfinBank
Фарҳод Мамажонов 45,7 фоиз билан «Инфинбанк»нинг асосий акциядори ҳисобланади. Банкнинг қолган акцияларига «Престиж Риелт» МЧЖ (25,6 фоиз), Тадбиркорликни ривожлантириш компанияси (19,2 фоиз), «Азиа Транс Терминал» МЧЖ (6,6 фоиз) ва Парвиз Абдусаматовга (2,9 фоиз) тегишли.
Тадбиркорликни ривожлантириш компанияси тўлиқ давлатга тегишли бўлиб, 2025 йилда «Инфинбанк»нинг 15 фоизини сотиб олганди. Кейинчалик компания банкдаги улушини 19 фоиздан кўпроққа оширди.
Маълумот учун, «Инфинбанк» 2026 йилнинг I чорагида 186,3 млрд сўм соф фойда олганди. Бу ўтган йилга нисбатан 117,8 млрд сўмга кўпроқ.
Safo Airlines Ўзбекистондаги навбатдаги авиакомпаниялардан бирига айланди. Ҳозиргача мамлакатда Узбекистан Airways'дан ташқари Centrum Air, Qanot Sharq, Silk Avia, Air Samarkand ва My Freighter каби авиакомпаниялар мавжуд.
