IT-компаниялар тўлайдиган солиқ миқдори, Каримов ҳайкали пойига қўйилган гулчамбар ва Тожикистондан сотиб олинган электр — 30 январ дайжести

Ўзбекистон Тожикистондан қанча электр энергияси сотиб олгани маълум бўлди

2025 йил якунларига кўра, Тожикистон Ўзбекистонга 894,7 миллион кВт/соат электр энергияси етказиб берди ва экспорт географиясида Афғонистондан кейин иккинчи ўринни эгаллади. Ушбу етказиб берилган энергиянинг умумий қиймати 18,19 миллион АҚШ долларига баҳоланмоқда. Тожикистоннинг жами экспорт ҳажми эса 2024 йилга нисбатан 37 фоизга ўсиб, 5,36 миллиард кВт/соатни ташкил этган. Таъкидланишича, экспортнинг асосий қисми сув захиралари мўл бўлган апрель–сентябрь ойларига тўғри келган.

Шу билан бирга, 2025 йилда Тожикистоннинг электр энергияси импорти ҳам 67 фоизга ошиб, 2,7 миллиард кВт/соатга етган ва бу импортнинг асосий қисми Ўзбекистон ҳиссасига тўғри келган. Бу жараён Марказий Осиё ягона энергетика тизими доирасида икки давлатнинг бир-бирини мавсумий қўллаб-қувватлашини кўрсатади. Тожикистон учун электр экспорти муҳим валюта манбаига айланиб, йил давомида умумий экспортдан қарийб 100 миллион доллар даромад олган.

«Йил футболчиси —Элдор Шомуродов» — ЎФА йил лауреатларини аниқлади

30 январ куни Тошкентда Ўзбекистон футбол ассоциациясининг тақдирлаш маросими бўлиб ўтди. Миллий терма жамоанинг илк бор Жаҳон чемпионати йўлланмасини қўлга киритиши йилнинг энг асосий воқеаси сифатида эътироф этилди. Европа майдонларидаги барқарор ўйини ва терма жамоадаги етакчилиги учун Элдор Шомуродов йилнинг энг яхши футболчиси, тарихий йўлланмани таъминлаган мураббийлардан бири Темур Кападзе эса йил мураббийи деб топилди. Шунингдек, Баҳодир Қурбонов ЎФА президенти лавозимига қайта сайланди.

Маросимда аёллар футболи, ҳакамлик ва ёшлар футболидаги ютуқлар ҳам алоҳида қайд этилди. Хусусан, Диёра Ҳабибуллаева йилнинг энг яхши аёл футболчиси, Илгиз Танташев эса энг яхши ҳакам деб эътироф этилди. Тарихий натижа сифатида Насибабону Тошмуҳаммедова эркаклар Суперлигасида бош ҳакамлик қилган илк аёл сифатида тақдирланди.

Шавкат Мирзиёев Ислом Каримов ҳайкали пойига гулчамбар қўйди

Шавкат Мирзиёев Биринчи Президент хотирасига эҳтиром кўрсатди 30 январь куни Ўзбекистон Республикаси Президенти Шавкат Мирзиёев Ислом Каримов таваллуд топган кун муносабати билан Тошкент шаҳридаги ҳайкал пойига гулчамбар қўйди. Маросим давомида Қуръон тиловат қилиниб, мустақил давлатчилик асосларини барпо этишда Биринчи Президентнинг кўрсатган беқиёс хизматлари ва инсоний фазилатлари ёдга олинди. Ислом Каримов номидаги ёдгорлик мажмуасида ўтган тадбирда давлат ва жамоатчилик арбоблари, илм-фан ва маданият намояндалари иштирок этди.

Биринчи Президент хотирасини ёд этиш маросимлари нафақат пойтахтда, балки унинг фаолияти билан боғлиқ Самарқанд ва Қарши шаҳарларида ҳам бўлиб ўтди. У ердаги Ислом Каримов ҳайкаллари пойига ҳам гуллар қўйилиб, эҳтиром кўрсатилди. Шавкат Мирзиёев ташаббуси билан Ислом Каримов хотирасини абадийлаштириш мақсадида Самарқандда маҳобатли мақбара барпо этилгани ва ҳар йили 30 январь санасини кенг нишонлаш эзгу анъанага айлангани алоҳида таъкидланди.

Apple, Meta ва Google — Ўзбекистонда IT-компаниялар қанча солиқ тўлади?

Хорижий IT-корпорациялар солиқлари 50 фоизга ошди 2025 йил якунларига кўра, Ўзбекистонда рўйхатдан ўтган 78 та хорижий IT-компания давлат бюджетига жами 181,3 млрд сўм солиқ тўлаган. Бу 2024 йилга нисбатан 1,5 баравар кўп демакдир. Энг диққатга сазовор жиҳати шундаки, жами тушумларнинг 93 фоизидан ортиғи атиги 10 та йирик компания ҳиссасига тўғри келган. Бу рақамлар мамлакат рақамли бозорининг жадал ўсиб бораётгани ва глобал брендларнинг Ўзбекистон иқтисодиётидаги иштироки кенгаяётганини тасдиқлайди.

Рейтингда биринчи ўринни Apple эгаллаб, йил давомида 49,5 млрд сўм солиқ тўлади. Ундан кейинги ўринларни Meta (49 млрд сўм) ва Google (44,4 млрд сўм) банд этди. Шунингдек, сунъий интеллект технологияларининг оммалашиши натижасида OpenAI компаниясининг тўловлари ҳам кескин ошиб, 11,7 млрд сўмга етди. Ҳатто фаолияти чекланган TikTok ҳам 3,5 млрд сўмлик солиқ тушумини таъминлаган.

«Ташаббусли бюджет»нинг бу галги мавсумида 1 минг 253 та маҳалла қатнашмайди

«Ташаббусли бюджет» дастурининг навбатдаги босқичида аввалги икки мавсумда кетма-кет ғолиб бўлган 1 минг 253 та маҳаллага танаффус берилди. Шу сабабли ушбу маҳаллалар 2026 йилги биринчи мавсумда мустақил равишда лойиҳа киритиш имкониятига эга бўлмайди. Амалдаги тартибга мувофиқ, кетма-кет икки мавсумда ғолиб бўлган маҳаллалар учун навбатдаги икки мавсумда лойиҳа киритиш чеклови қўлланилади. Шу асосда 2026 йил 1-мавсумида иштирок эта олмайдиган маҳаллалар рўйхати шакллантирилган. Рўйхат билан бу ерда танишишингиз мумкин.

Шу билан бирга, айрим ҳудудлар учун истисно сақлаб қолинган. Хусусан, 23 та туман ва шаҳарда мавжуд маҳаллалар сони 15 та ва ундан кам бўлгани сабабли, ушбу ҳудудлардаги маҳаллаларга танаффус қўлланмади. Танаффус берилган маҳаллалар учун лойиҳа фаолияти тўлиқ чекланмайди. Ушбу маҳаллалар шерикчилик асосида, яъни бошқа маҳаллалар билан ҳамкорликда лойиҳаларни илгари суриш имкониятига эга.