Президент нуқта қўйган пешлавҳалар мавзуси, «Ўзбектелеком»нинг рекорд даражадаги соф фойдаси ва карталар ўртасидаги 0 фоиз комиссия — 5 май дайжести

Тошкентда 6 та ҳоким қарори суд томонидан бекор қилинди

2026 йил март ойида Ўзбекистонда табиий газ қазиб олиш 2,7 млрд куб метрни ташкил этиб, ўтган йилга нисбатан 30,8 фоизга камайди. Миллий статистика қўмитаси маълумотига кўра, бу сўнгги йиллардаги энг паст кўрсаткичлардан бири бўлиб, кунлик қазиб олиш ҳажми ҳам 125,8 млн куб метрдан 87,1 млн куб метрга тушган.

2026 йилнинг биринчи чорагида жами 9,6 млрд куб метр газ қазиб олингани қайд этилди, бу ўтган йилга нисбатан 15 фоизга кам. Шу билан бирга, нефт қазиб олиш ҳам бироз қисқарган, аммо айрим саноат йўналишларида ўсиш сақланиб қолган — хусусан, электр энергияси ва дизель ёқилғиси ишлаб чиқариш ҳажми ошган.

Иқтисодчи Отабек Бакиров бу каби кескин пасайишни ноодатий ҳолат сифатида баҳолаб, бу йирик конлардаги муаммолар ёки тизимли инқироз билан боғлиқ бўлиши мумкинлигини айтган. Шу билан бирга, ёқилғи импорти ҳажми ҳам ошиб, энергетика соҳасида босим кучайиб бораётгани кузатилмоқда.

Ўзбекистонда инфляция биринчи марта 7 фоизга тушди

2026 йил апрель ойида Ўзбекистонда йиллик инфляция 7 фоизни ташкил қилиб, сўнгги йиллардаги энг паст даражага тушди. Миллий статистика қўмитаси маълумотига кўра, ойлик инфляция 0,6 фоиз бўлган. Марказий банк эса инфляцияни 5 фоизгача туширишни мақсад қилган.

Инфляцияга асосий босимни озиқ-овқат маҳсулотлари берди: ой давомида улар нархи 1 фоизга ошган. Айниқса, гўшт маҳсулотлари (3–3,7 фоиз), шакар ва балиқ нархи сезиларли қимматлашган. Шу билан бирга, тухум, гуруч ва айрим сабзавотлар арзонлашиб, умумий кўрсаткични бироз жиловлаган.

Ёқилғи ва хизматлар сегменти ҳам инфляцияга таъсир кўрсатди: бензин ва метан нархи ошган, транспорт хизматлари ва коммунал тўловларда ҳам ўсиш қайд этилган. Шу билан бирга, айрим маҳсулотлар арзонлашиши инфляция ўсишини чеклашга хизмат қилган.

Бир шахснинг карталари ўртасидаги ўтказмалар комиссиясиз бўлади

Ўзбекистонда жисмоний шахслар ўз банк карталари ўртасида пул ўтказмаларини комиссиясиз амалга ошира олади. Бу таклиф Шавкат Мирзиёев иштирокидаги тақдимотда маъқулланиб, нақдсиз тўловларни рағбатлантиришга қаратилган.

Шу билан бирга, кешбек тизимини тезкор қайтариш, банк комиссияларини оптималлаштириш ва антифрод SMS харажатларини қайта кўриб чиқиш таклиф қилинди. Мобил иловалар ва биометрик идентификация орқали хавфсизликни таъминлаш каби муқобил ечимлар ҳам кўриб чиқилмоқда.

Қўшимча равишда, солиқ ва ташқи савдо соҳаларида ҳам енгилликлар таклиф этилди. Давлат раҳбари тадбиркорлик учун тўсиқларни камайтириш, рақамлаштиришни қулайликка айлантириш ва бизнес муҳитини яхшилаш бўйича аниқ вазифалар қўйди.

Компания номи ёзилган пешлавҳалар реклама деб ҳисобланмайди

Ўзбекистонда корхона номи ва фаолият турини билдирувчи пешлавҳалар эндиликда реклама деб ҳисобланмаслиги мумкин. Бу таклиф Шавкат Мирзиёев иштирокида кўриб чиқилиб, тадбиркорлар учун ортиқча бюрократик талабларни камайтириш мақсадида маъқулланди.

Амалда айрим ҳолларда ҳатто компания номи туширилган оддий белгилар ҳам реклама сифатида баҳоланиб, рухсатнома ва тўлов талаб қилинган. Янги тартибга кўра, бундай ахборот белгиларини реклама деб ҳисобламаслик ва улар учун махсус “паспорт” талабини бекор қилиш режалаштирилмоқда.

Шу билан бирга, реклама жойлаштириш бўйича дизайн талабларини босқичма-босқич жорий этиш ва брендларни транспорт воситаларида жойлаштиришни соддалаштириш ҳам таклиф этилди. Бу ўзгаришлар бизнес муҳитини енгиллаштириш ва тадбиркорлик фаолиятини қўллаб-қувватлашга қаратилган.

«Ўзбектелеком»нинг соф фойдаси 16 бараварга ошди

«Ўзбектелеком» 2026 йилнинг биринчи чорагида молиявий натижаларини кескин яхшилади. Компания ҳисоботига кўра, соф фойда 412,25 млрд сўмни ташкил этган бўлиб, бу ўтган йилнинг шу даврига нисбатан қарийб 16 бараварга кўпдир (2025 йил I чоракда — 25,73 млрд сўм).

Даромадлар ҳам барқарор ўсишни кўрсатган: хизмат ва маҳсулотлардан тушган тушум 2,84 трлн сўмга етди (+12,5%). Шу билан бирга, таннарх деярли ўзгармаган (1,68 трлн сўм), бу эса ялпи фойдани 1,16 трлн сўмгача оширган. Асосий фаолиятдан олинган фойда ҳам 56,8%га ўсиб, 631,93 млрд сўмни ташкил этди.

Соф фойданинг кескин ошишига молиявий даромадлар катта таъсир кўрсатган. Хусусан, валюта курслари фарқидан 244,23 млрд сўм даромад олинган. Ҳисобот даврида компания 353,4 млрд сўм солиқ тўлаб, хизмат кўрсатиш соҳасидаги энг йирик солиқ тўловчилардан бири бўлиб қолди.