Россия нефти экспорти 2022 йилдан бери энг паст даражага тушди

Россиядан нефт хомашёси экспорти 2025 йил охири ва 2026 йил бошида сезиларли даражада камайди. Бу ҳақда «Bloomberg» агентлиги хабар бермоқда.

Агентлик маълумотларига кўра, экспорт ҳажмларининг қисқариши ва нархларнинг кетма-кет пасайиши натижасида нефт етказиб бериш қиймати 2022 йил феврал ойидан бери энг паст даражага тушган.

4 январгача бўлган тўрт ҳафта давомида Россия кунига ўртача 3,43 млн баррел нефть юклаган. Бу 21 декабргача бўлган аввалги тўрт ҳафталик кўрсаткичдан тахминан 440 минг баррелга кам. Экспорт ҳажмларидаги бу пасайиш жаҳон бозоридаги ноқулай конъюнктура ва санкция босими билан изоҳланмоқда.

Агентлик ҳисоб-китобларига кўра, 4 январгача бўлган тўрт ҳафта давомида Россия нефт экспортининг ўртача ҳафталик ялпи қиймати 960 млн долларни ташкил этган. Бу 28 декабргача бўлган даврга нисбатан 10 фоизга кам. Бундай кўрсаткичлар Украина уруши бошланган илк ойлардан бери кузатилмаган даражада паст ҳисобланади.

Шу даврда Болтиқ ва Қора денгиз портларидан етказиб берилаётган «Urals» навли нефть нархи ҳам сезиларли тушган. Болтиқ денгизи орқали экспорт қилинаётган нефт баррели 36,69 долларга, Қора денгиз орқали етказиб берилаётгани эса 34,82 долларгача арзонлаган. Бу бир ҳафта ичида тахминан 1,10 долларлик пасайишни англатади.

«Bloomberg»нинг таъкидлашича, Россия нефти нархлари жаҳон эталон маркаларига нисбатан тезроқ пасайган. Бу ҳолат АҚШ томонидан октябр ойида Россиянинг энг йирик нефт экспортчилари — «Роснефт» ва «Лукойл»га қарши жорий этилган санкциялар билан боғлиқ. Мутахассислар фикрича, ушбу чекловлар Россия нефть экспортига босимни 2026 йилда ҳам сақлаб қолиши мумкин.