AQSH elchilari Putin bilan muzokaralarda hech qanday natijaga erishmadi

Donald Trampning maxsus vakillari Moskvaga kelganiga qaramay, tinchlikka erishish borasida sezilarli natija bo‘lmadi. Aksincha, Rossiya qish davomida Ukrainaga hujumlarni kuchaytirishni rejalashtirmoqda. «Bloomberg» manbalariga ko‘ra, Moskva Ukrainaning qarshilik ko‘rsatish qobiliyatini va Kiyev ittifoqchilarining unga yordam berishga qanchalik tayyor ekanini sinab ko‘rmoqchi.

Agentlik suhbatdoshlaridan birining aytishicha, yaqin olti oy ichida Rossiya Ukrainadagi elektr energiyasi va isitish infratuzilmasiga zarbalarni kuchaytirishi mumkin. Maqsad — qishda aholi uchun hayot sharoitlarini yanada og‘irlashtirish. Shu bilan birga, Rossiya Yevropada gibrid hujumlar va siyosiy aralashuvlarni ham kuchaytirib, Ukrainaga bo‘lgan qo‘llab-quvvatlashni susaytirishga harakat qilishi mumkin.

«Bloomberg» manbalaridan biriga ko‘ra, Vladimir Putin 2027-yil bahorga borib Rossiya uchun hozirgidan ham kuchliroq pozitsiya yaratishga umid qilmoqda. Yana bir manba esa jiddiy tinchlik muzokaralari kelasi yilgacha boshlanishi ehtimoli juda pastligini aytgan.

Agentlik manbalarining ta’kidlashicha, Putin o‘z pozitsiyasini yumshatgani haqida hozircha hech qanday belgi ko‘rsatmagan. Bu AQSH tomonidan tinchlik muzokaralarini qayta boshlash uchun yangi takliflar zarurligi haqidagi so‘nggi signallarga qaramay sodir bo‘lmoqda.

Trampning maxsus vakillari Stiv Uitkoff va Jared Kushner 5-sentabr kuni Moskvaga borib, Vladimir Putin bilan uchrashgan. 6-sentabrda, ular Kiyevga borgan. «Financial Times» manbalariga ko‘ra, Kiyevdagi muzokaralarda tomonlar urush qishgacha tugashi ehtimoli past ekanini umumiy ravishda tan olgan. Uitkoff va Kushner, jumladan, Ukrainaga og‘ir qish davrini yengib o‘tishda qanday yordam berish mumkinligini ham muhokama qilgan.

Uitkoff va Kushner Moskva va Kiyevga borgan paytda Putin Kiyevga zarbalarni uch kunga to‘xtatish haqida buyruq bergan. Zelenskiy esa o‘z navbatida Ukraina «Rossiya havo hududining normal ishlashini ta’minlashini, amerikalik muzokarachilar xavfsiz kelishi uchun sharoit yaratishini» va’da qilgan.

Biroq 8-sentabr kuni Rossiya Kiyevga hujumlarni yana qayta boshlagan.

Suhbatdoshlardan birining aytishicha, Putin Amerika elchilarining tashrifidan 18-20-sentabr kunlari bo‘lib o‘tadigan Rossiya Davlat Dumasiga parlament saylovi oldidan mamlakat ichkarisida kuch namoyish etish uchun foydalangan.

«U Amerika delegatsiyasini Kremlda uchrashishdan oldin kechgacha kutishga majbur qildi, shu sababli Uitkoff va Kushner Putinning elchisi Kirill Dmitriyev bilan Moskva markazidagi qimmatbaho restoranda bir necha soatlik tushlik qilishga majbur bo‘lishdi», — deb qo‘shimcha qildi suhbatdosh.

«Bloomberg» manbalarining ta’kidlashicha, AQSH, Rossiya va Ukraina vakillari o‘rtasidagi uch tomonlama muzokaralar Davlat Dumasiga saylovdan keyin qayta boshlanishi mumkin, garchi bunday muhokamalar tinchlik bitimi tuzish jarayoniga «sezilarli ta’sir ko‘rsatishi ehtimoldan yiroq».