Hokimlar Londonga malaka oshirish uchun yuboriladi

O‘zbekiston shahar va tuman hokimlari uchun Londonda qisqa muddatli malaka oshirish kurslari tashkil etiladi. Bu tashabbus davlat boshqaruvida xalqaro ilg‘or tajribani joriy etish va mahalliy boshqaruv samaradorligini oshirishga qaratilgan.

«Dunyo» axborot agentligi ma’lum qilishicha, O‘zbekistonning Buyuk Britaniyadagi elchisi Ravshan Usmanov hamda «Civil Service College» nodavlat ta’lim muassasasi vakillari o‘rtasida uchrashuv bo‘lib o‘tdi. Muloqotda davlat xizmati sohasidagi hamkorlikni kengaytirish, ilg‘or xorijiy tajribani o‘rganish va uni milliy amaliyotga tatbiq etish masalalari muhokama qilindi.

Qo‘shma ta’lim dasturlari

Britaniya tomoniga O‘zbekistonda davlat xizmatini rivojlantirish, istiqbolli kadrlar zaxirasini shakllantirish va ularning muntazam kasbiy o‘sishini ta’minlashga qaratilgan islohotlar haqida ma’lumot berildi. Tomonlar qo‘shma ta’lim dasturlarini ishlab chiqish, treninglar tashkil etish, shuningdek, onlayn va gibrid o‘quv platformalarini yaratish imkoniyatlarini ko‘rib chiqdi.

Muzokaralarda ekspertlar almashinuvi va qo‘shma tadqiqot loyihalarini amalga oshirishga alohida e’tibor qaratildi. Uchinchi tomon sifatida boshqaruv jarayonlarini raqamlashtirish va samarali menejment modellarini joriy etish yo‘nalishlari ham muhokama qilindi.

Uchrashuv yakunida shahar va tuman hokimlari uchun qisqa muddatli malaka oshirish kurslarini yo‘lga qo‘yish, davlat xizmati sohasida o‘zaro manfaatli hamkorlikni izchil davom ettirish bo‘yicha kelishuvga erishildi.

Ma’lumot uchun, Civil Service College 1970 yilda Britaniya hukumati huzurida milliy maktab sifatida tashkil etilgan. 2012 yildan buyon u mustaqil ta’lim markazi sifatida faoliyat yuritib, davlat xizmatchilari tayyorlash va qayta tayyorlashga ixtisoslashgan.