Наркологик беморларни мажбурий даволаш муддати белгиланди
Ўзбекистонда суд қарори билан мажбурий даволанадиган наркологик беморлар учун даволаш жараёни 18 ойдан ошмайдиган янги тартиб асосида ташкил этилади.
Адлия вазирлиги маълум қилишича, «Мажбурий даволаш учун мўлжалланган наркология муассасаларида даволаш жараёнини ташкил этиш тартиби тўғрисида»ги низом давлат рўйхатидан ўтказилди. Янги ҳужжат суд қарори асосида мажбурий даволанадиган наркотик моддага қарам шахслар учун махсус тиббий муассасаларда амалга ошириладиган барча жараёнларни аниқ тартиб асосида белгилаб беради.
Низомга кўра, бемор муассасага қабул қилинганидан сўнг беш кун ичида унинг даволаш муддати тиббий комиссия томонидан белгиланади. Комиссия таркибига муассаса раҳбари ва икки нафар нарколог шифокор киради. Улар беморнинг клиник ҳолати, даволаш усуллари ва реабилитацияга бўлган эҳтиёжини баҳолаб, индивидуал қарор қабул қилади.
Мажбурий даволаш муддати 18 ойдан ошмаслиги қатъий тартиб сифатида белгилаб қўйилган. Бу чеклов инсон ҳуқуқларини таъминлаш, даволаш жараёнини ўз вақтида қайта кўриб чиқиш ва беморнинг ҳолатини доимий назорат қилишга қаратилган.
Беморларнинг муассасадан чиқарилиши икки асосий ҳолатда амалга оширилади.
Биринчиси — мажбурий даволаш муддати тугаганидан кейин беморнинг клиник ҳолати қониқарли деб топилганда.
Иккинчиси — даволашни ўтказишга тўсқинлик қиладиган қўшимча оғир касалликлар аниқланганда.
Янги тартиб мажбурий даволаш тизимини аниқ меъёрлар билан тартибга солиш, тиббий қарорларни малакали мутахассислар томонидан тез ва шаффоф қабул қилинишига хизмат қилиши кутилмоқда.
