ОАВ: Трамп суиқасд хавфи сабаб Туркиядан бошқа самолётда яширинча олиб кетилди

АҚШ президенти Доналд Трамп Эрон томонидан суиқасд уюштирилиши таҳдиди сабабли Туркияда бўлиб ўтган НАТО саммитидан сўнг мамлакатни яширинча тарк этган. Махсус хизматлар томонидан ишлаб чиқилган операция натижасида Америка етакчиси бошқа самолётда эвакуация қилинган. Бу ҳақда 10 август куни «The Washington Post» нашри маълум қилди.

Чалғитувчи манёвр ва кейтеринг машинасидаги эвакуация

Президент саммитга Қатар томонидан АҚШга совға қилинган ва махсус янгиланган «Boeing 747-8» самолётида келган эди. Бироқ 7-8 июл кунлари бўлиб ўтган тадбирдан сўнг, АҚШ махсус хизматлари Эрон томонидан Трамп ва унинг самолётига қарши таҳдид борлигини аниқлаган, дейилади хабарда. Шу муносабат билан президентни Туркиядан хавфсиз олиб чиқиш бўйича пухта ўйланган режа амалга оширилган.

Нашр маълумотларига кўра, Трамп аввал журналистлар кўз ўнгида эски «Air Force One» самолётига чиққан. Сўнгра у самолётнинг бошқа томонидан аэропортнинг кейтеринг хизмати машинаси орқали яширинча олиб чиқилиб, яқинда турган кичикроқ «C-32A» ҳарбий самолётига ўтказилган.

«Президент Доналд Трампга нисбатан суиқасд хавфи ўтган ойда фавқулодда операцияни келтириб чиқарди, унинг давомида у Туркиядан яширинча учиб кетди», — дея мақоладан иқтибос келтиради нашр.

Шу билан бирга, Оқ уй ходимларининг бир қисми ва журналистлар президент шу бортда деб ҳисоблаб, эски «Air Force One»да қолган. Уларга парвоз вақтида ойна пардаларини ёпиб туриш буюрилган ва самолёт гўёки ичида Трамп бордек чалғитувчи манёвр сифатида йўлга чиққан.

Аслида эса Трамп «C-32A» самолётида Буюк Британиядаги «RAF Mildenhall» ҳарбий базасига олиб борилган. Билдирилишича, президент ўша ердан яна ўз самолётига ўтиб, Вашингтонга хавфсиз тарзда учиб кетган.