Ўзбекистоннинг энг қулай тўлов иловалари аниқланди

Ўзбекистондаги банк ва финтех хизматларининг мобил иловалари қулайлигини баҳоловчи CX Banking Index 2026 мустақил тадқиқоти натижалари эълон қилинди. 5 ноябрь куни бўлиб ўтган тақдимот маросимида бешта асосий номинация бўйича энг яхши мижозлар тажрибасини (Customer Experience) тақдим этган иловалар номи маълум қилинди.

Customer Experience Laboratory (CX Lab) томонидан ўтказилган мазкур тадқиқотда жами 39 та рақамли маҳсулот — 34 та банк ва 5 та финтех иловаси қамраб олинган. Таҳлилчилар хизматларнинг соддалиги, шаффофлиги ва мослашувчанлигини амалий синовдан ўтказиб, ягона iCX индексини шакллантирган.

Тадқиқот натижаларига кўра, номинациялар бўйича кучли учлик қуйидагича кўриниш олди:

Daily banking — кундалик банк хизматлари

Ушбу номинацияда мижозларнинг банк иловаларидан кундалик фойдаланиш қулайлиги баҳоланган. Бунда карта балансини кўриш, карталарни бошқариш, пул ўтказиш ва турли хизматлар учун тўлов қилиш каби амаллар инобатга олинган.
— 1-ўрин — payme
— 2-ўрин — OFB
— 3-ўрин — Beepul

CX Progress Leaders — мижозлар тажрибасини яхшилашдаги ўсиш

Мазкур номинацияда банк иловаларининг мижозлар учун қулайлик даражаси ўтган йилги натижалар билан таққосланган. Содда қилиб айтганда, иловаларнинг бир йил давомида фойдаланувчилар учун қанчалик такомиллашгани баҳоланган.

— 1-ўрин — OFB
— 2-ўрин — TBC UZ
— 3-ўрин — KAPITALBANK.Online

First impression — биринчи таассурот

Номинацияда фойдаланувчининг иловадан илк бор фойдаланиш жараёни ўрганилган. Жумладан, рўйхатдан ўтиш, шахсни тасдиқлаш ва картани иловага улаш босқичлари баҳоланган.
— 1-ўрин — MONIX
— 2-ўрин — Click SuperApp
— 3-ўрин — Beepul

P2P transfers — картадан картага пул ўтказмалари

Ушбу номинацияда бир фойдаланувчидан бошқасига пул ўтказиш жараёнининг қулайлиги баҳоланган. Бунда қабул қилувчини топиш, карта ёки ҳисобни танлаш ҳамда пул ўтказмасини амалга ошириш жараёни қанчалик тушунарли эканига эътибор қаратилган.

— 1-ўрин — payme
— 2-ўрин — Beepul
— 3-ўрин — OFB

Payments — тўловлар

Бу номинацияда мобил алоқа, электр энергияси ва бошқа хизматлар учун илова орқали тўлов қилиш жараёни ўрганилган. Хусусан, керакли хизматни излаб топиш ва тўловни амалга ошириш қанчалик осон экани баҳоланган.
— 1-ўрин — MONIX
— 2-ўрин — OFB
— 3-ўрин — Uzum Bank

CX Banking Index 2026 тадқиқоти мобил иловаларда мижозлар дуч келадиган хизмат кўрсатиш жараёнларини баҳолаган. Шу сабабли номинацияларда эгалланган ўринлар банкнинг молиявий жиҳатдан қанчалик барқарор ёки ишончли эканини англатмайди. Улар фақат тадқиқотда текширилган хизматлардан фойдаланиш қулайлиги бўйича натижаларни акс эттиради.

Шунингдек, тадқиқот Android иловалари асосида ўтказилган. Шу боис унинг натижаларини iOS иловалари фаолиятига ёки банкнинг барча хизматларига тўлиқ татбиқ этиб бўлмайди. Бундан ташқари, бугунги кунда Ўзбекистонда 50 дан ортиқ тўлов ташкилоти мавжуд. Тадқиқотда эса уларнинг барчаси қамраб олинмаган.