Путин Трампга Эрон масаласида ёрдам таклиф қилди

АҚШ президенти Доналд Трамп Россия президенти Владимир Путин билан «жуда яхши» телефон мулоқоти ўтказганини маълум қилди. Бу ҳақда у Флоридадаги матбуот анжуманида айтиб ўтди, унинг сўзларидан «BBC News» ва «Reuters» иқтибос келтирмоқда.

Трампнинг сўзларига кўра, Путин Эрон билан низони ҳал қилишда «ёрдам бериш» истагини билдирган.

«Мен «агар Украина ва Россия ўртасидаги урушни тугатсангиз, кўпроқ фойдалироқ иш қилган бўлардингиз. Бу анча фойдалироқ бўларди», деб айтдим», — деди Трамп.

У Россия-Украина урушини «чексиз жанг» деб атади.

«Президент Путин ва [Украина] президент Зеленский ўртасида жуда катта нафрат мавжуд, улар келиша олмайдигандек кўринмоқда. Аммо менимча, бу мавзуда ижобий суҳбат бўлди», — деди АҚШ президенти.

Путин ва Трамп ўртасидаги телефон мулоқоти 9 март куни бўлиб ўтди. Кремлга кўра, суҳбат бир соатга яқин давом этган ва АҚШ президенти ташаббуси билан амалга оширилдган.

Россия президенти ёрдамчиси Юрий Ушаковнинг таъкидлашича, суҳбатнинг асосий мавзулари Яқин Шарқдаги уруш ва Россиянинг Украина билан урушини якунлаш бўйича музокаралар бўлган.

Путин Эрон билан урушни тезроқ сиёсий-дипломатик йўл билан тугатиш бўйича бир қатор фикрларни билдирган.

«Шунингдек, АҚШ ва Трампнинг Россия-Украина урушини якунлаш жараёнидаги саъй-ҳаракатларини олқишлади», - дея таъкидлади Кремл.