«Qo‘yliq» va Nurafshonni bog‘lovchi yangi yo‘l quriladi
«Qo‘yliq» bozoridan Toshkent viloyati Nurafshon shahri markazigacha qatnov vaqtlarini qisqartirish uchun yangi BRT tizimi joriy etiladi.
Toshkent viloyati Nurafshon shahridan Toshkent shahrining Bektemir tumanigacha tezyurar avtobus qatnovini yo‘lga qo‘yish bo‘yicha BRT tizimi konsepsiyasi rasman tasdiqlandi. Ushbu qaror jamoat transportini rivojlantirish va aholiga tezkor hamda qulay xizmat ko‘rsatishni ta’minlashga qaratilgan.
Yangi yo‘l qurilishi
Loyiha doirasida «Qo‘yliq» bozoridan Nurafshon markazigacha 23 kilometrlik yangi yo‘l quriladi. Yo‘l 6 tasmali bo‘lib, uning markaziy qismida maxsus avtobus yo‘lagi joylashtiriladi. Bu esa avtobuslar harakatini boshqa transport vositalaridan ajratib, tezlik va xavfsizlikni ta’minlaydi.
Yo‘nalish bo‘ylab jami 9 ta bekat qurilishi rejalashtirilgan. Shuningdek, piyodalar uchun alohida yo‘laklar, yerosti o‘tish joylari, yo‘l o‘tkazgichlar va ko‘priklar barpo etiladi. Bekatlarga kirish va chiqish jarayoni xavfsiz tarzda tashkil etilishi ta’kidlanmoqda.
Loyihani amalga oshirish orqali zamonaviy tezyurar avtobuslar qatnovi yo‘lga qo‘yilib, transport infratuzilmasi yanada yaxshilanadi. Bu esa yo‘lovchilar uchun vaqt tejash, qulaylik va sifatli xizmat ko‘rsatish imkonini oshiradi.
Shu bilan birga, «Yo‘linjiniringloyiha» MCHJ loyiha jarayoni bo‘yicha doimiy ravishda axborot berib borishi belgilangan. Qaror ijrosi ustidan nazorat esa viloyat kengashining tegishli komissiyasi va mas’ul rahbarlar zimmasiga yuklatildi.
